С заботой о детях

У сярэдзіне ліпеня ў аграгарадку Навасёлкі праводзілася традыцыйнае свята, на якім ушаноўвалі тых, хто вызначыўся на веснавых палявых работах, падчас нарыхтоўкі кармоў, лепшых жывёлаводаў. Ім былі ўручаны граматы, прэміі, а ўсіх прысутных парадаваў сваім выступленнем вядомы спявак Сяргей Славянскі.

Атрымалі цудоўны падарунак і дзеці — у скверы ля цэнтральнай плошчы к гэтаму часу была абсталявана комплексная гульнёвая пляцоўка. Ініцыятыва належыць старшыні Навасёлкаўскага сельвыканкама К. Э.  Мядзведзеву.

— У нас пражывае нямала моладзі, — расказваў Канстанцін Эдуардавіч. — У гаспадарцы створаны нядрэнныя ўсовы для працы, людзі атрымліваць дастойную заработную плату, маюць жыллё, таму і прыжываюцца тут. Дзіцячы садок наведвае больш за трыццаць дзяцей. У сямі сем’ях у бліжэйшы час чакаецца папаўненне, у нас і 14 мнагадзетных. Падчас адной маёй сустрэчы з маладымі сем’ямі паступіла прапанова абуладкаваць месца для адпачынку з дзецьмі. Я згадзіўся пры ўмове, што працаваць над гэтым будзем сумесна. У бацькоў ёсць рукі, і чаму б іх не прыкласці да добрай справы? Разглядаліся розныя праекты і варыянты абуладкавання. Ажыццявіць задуманае дапамог індывідуальны прадпрымальнік Яўгеній Мар’янавіч Кісель (дарэчы, у яго месяц таму нарадзіўся сынок). Ён займаецца вырабам дамоў, альтанак з бруса. Вольным часам Яўгеній са сваімі калегамі працаваў над канструкцыяй для дзіцячай пляцоўкі. Гэта дабрачынны ўчынак. Звярнуліся па дапамогу і да ўсіх жыхароў аграгарадка: на добраўпарадкаванне яны сабралі каля двух мільёнаў рублёў. За іх купілі скат-горку са шклопластыка. Пэўную дапамогу аказалі кіраўніцтва ААТ “Навасёлкі-Лучай” і шэфы — Пастаўскі прафтэхкаледж.

Асноўныя работы на пляцоўцы завершаны. Вось і ў той дзень, калі ў Навасёлках было свята, арыгінальная, казачная альтанка-церамок, зробленая без адзінага цвіка, прыцягвала ўвагу і малых, і дарослых. Хтосьці гушкаўся на арэлях, хтосьці катаўся з горкі, а хто “будаваў” пясочныя палацы ў пясочніцы, некаторыя стараліся закінуць баскетбольны мяч у карзіну. Бацькі толькі паспявалі глядзець за перамяшчэннем дзяцей. Удала размясціўся побач з альтанкай і казачны грыб, выразаны з дрэва. Ён, як вартаўнік, сочыць за парадкам, радуецца дзіцячым галасам.

— Парк стаў любімым месцам адпачынку, — гаварыў К. Э. Мядзведзеў. — Ствараць прыгажосць, падтрымліваць яе можна толькі сумеснымі намаганнямі з мясцовымі жыхарамі. Зробленае сваімі рукамі больш цэніцца і шануецца. Таму спадзяюся на разуменне і падтрымку навасёлкаўцаў у будучым.

У задумах старшыні сельскага Савета далейшае добраўпарадкаванне як аграгарадка, так і дзіцячай пляцоўкі.

Анна АНІШКЕВІЧ.  

Фота Пятра КУРЫЛОВІЧА.