Глыбоцкія энергетыкі занялі 2 месца на рэспубліканскіх спаборніцтвах у Брэсце

Падчас адкрыцця спаборніцтваў

Каманда "Глыбоцкіх электрасетак" (злева направа): В. Шчарбіцкі, Г. Статкевіч, Г. Шамовіч, В. Пачкоўскі, А. Лабада

Падчас выканання этапу

Падчас выканання этапу

Падчас ліквідацыі пажару

Падчас выканання этапу

Падчас спаборніцтваў

Падчас спаборніцтваў

Усе ўдзельнікі каманды

У рэспубліканскіх спаборніцтвах брыгад па рамонце і абслугоўванню абсталявання падстанцый 35 кв і вышэй, якія прайшлі на палігоне ў Брэсце з 17 па 21 чэрвеня, калектыў "Глыбоцкіх электрасетак" годна прадставіў энергетыкаў Віцебскай вобласці. Трэба адзначыць, што калектыў філіяла «Глыбоцкія электрычныя сеткі» РУП «Віцебскэнерга» стала займаюць прызавыя месцы на рэспубліканскім узроўні, а таксама неаднаразова станавіліся першымі ў Беларусі, а восенню 2007г., прадстаўляючы Беларусь на IV Міжнародных спаборніцтвах сярод энергетыкаў, сталі лепшымі ў СНД.

Спаборніцтвы праходзілі ў шэсць этапаў. Максімальная колькасць балаў за этап - 200.

Умовы першага этапу былі наступныя - праверка ведаў дзейсных інструкцый па правілах тэхнічнай эксплуатацыі і пажарнай бяспекі. Другі этап спаборніцтваў складаўся з цеплавізійнага кантролю абсталявання ТП-10/0,4 кв. Падчас трэцяга і наступных этапаў удзельнікі спаборніцтваў аглядалі раз'яднальнік РДЗ-2-110/1000, замянялі ізалятар і рэгулявалі раз'яднальнік; адбіралі спробы масла, замянялі манометр і далівалі масла на ўводзе ГМТА-110/800 з вымярэннем супраціву ізаляцыі ўводу; ліквідавалі пажар у КРУН-10кв; згодна з правіламі вызвалялі манекен ад дзеяння электрычнага току і аказвалі яму першую дапамогу.

Па выніках спаборніцтваў першае месца заняла каманда Жлобінскіх ЭС (РУП «Гомельэнерга»), а трэцяе месца ў каманды Маладзечанскіх ЭС (РУП «Мінскэнерга»).

P.S. Глыбачане могуць па праве ганарыцца не толькі гісторыяй горада, вядомымі выхадцамі зямлі глыбоцкай, фірмовай згушчонкай, але і прафесіяналамі з "Глыбоцкіх электрасетак", якіх яшчэ трэба пашукаць.