Рэліквіі святой Тэрэзы ад Дзіцяці Ісуса прывязуць у наш рэгіён + расклад

На абразах Тэрэзу ад Дзіцяці Ісуса малююць з кветкамі і Крыжам у руках. Манахіня не мела магчымасці рабіць вялікія па чалавечых мерках учынкі. Часам яна проста брала кветкі, адрывала пялёсткі і абсыпала імі выяву распятага Хрыста.

На працягу ўсяго лета з касцёла ў касцёл у Беларусі будуць перавозіць рэліквіі святой Тэрэзы ад Дзіцяці Ісуса (Тэрэзы Малой; Тэрэзы з Лізьё). Гэтая простая манахіня з ордэна кармелітак стала адной з самых яскравых постацяў у гісторыі Касцёла апошніх стагоддзяў.

Тэрэза ад Дзіцяці Ісуса (сапраўднае прозвішча: Мартэн) нарадзілася ў Францыі ў 1873 і адышла ў вечнасць у 1897 годзе. Пакінула пасля сябе некалькі рукапісаў, вядомых як “Гісторыя адной душы”. Гэта не выкшталцоныя тэалагічныя разважанні – Тэрэза не мела тэалагічнай адукацыі – а простае і шчырае апісанне ўласнага жыцця і адносінаў з Богам.

Твор гэты насамрэч уражвае. Тэрэза ўмела ўбачыць Божае дзеянне ў кожнай сітуацыі свайго жыцця, і з захапленнем распавядае, як Бог навучаў і кшталтаваў яе цягам жыцця. Яна распавядае, як у многіх, дробязных на першы погляд, справах, яна старалася адмаўляцца ад сваёй волі, каб выявіць любоў да бліжняга і да Бога. Тэрэза прызнаецца ў любові да Бога – такой, што хацела б нават пакутваць дзеля Яго.

“Гісторыю адной душы” чытаюць хрысціяне на ўсіх кантынентах. У 1997 годзе Папа Ян Павел ІІ надаў Тэрэзе ад Дзіцяці Ісуса статус Настаўніка Касцёла.

Такія творы немагчыма пераказаць. Іх трэба чытаць.

Знаёмства з духоўнай спадчынай Тэрэзы ад Дзіця Ісуса было б найлепшай падрыхтоўкай да сустрэчы яе рэліквій на нашай глыбоцкай, браслаўскай, пастаўскай etc зямлі.

Спампаваць “Гісторыю адной душы” на расійскай мове

* * *

Расклад перэгрынацыі рэліквій святой Тэрэзы па Віцебскай дыяцэзіі

Браслаў – 17 жніўня — прыбыццё рэліквій у 09.30

Відзы - 18 жніўня — прыбыццё рэліквій у 10.00

Паставы - 19 жніўня — прыбыццё рэліквій у 10.00

Мёры - 20 жніўня — прыбыццё рэліквій у 12.00

Шаркоўшчына - 21 жніўня — прыбыццё рэліквій у 10.00

Глыбокае - 22 жніўня — прыбыццё рэліквій у 10.00

Параф’янава - 23 жніўня — прыбыццё рэліквій у 11.00

Полацк - 24 жніўня — прыбыццё рэліквій у 10.00

Лепель - 25 жніўня — прыбыццё рэліквій у 11.00

Орша - 26 жніўня — прыбыццё рэліквій у 12.00

Віцебск (катэдра) - 28 жніўня — прыбыццё рэліквій у 18.00.

Расклад пададзены паводле Catholic.by

* * *

Рэліквіярый св. Тэрэзы. Фота Catholic.by