У Бычках на Ушаччыне адзначылі 90-годдзе з Дня нараджэння Васіля Быкава (фота)

На свята з’ехалася больш за дзве сотні гасцей.

Нясуць партрэт Яўгена Жыхара

У гэтым годзе ўлады і дэмакратычная грамадскасць адзначалі свята паасобку. Афіцыйнае мерапрыемства прайшло 19 чэрвеня, у дзень нараджэння пісьменніка. Грамадзянская супольнасць Беларусі сваё святкаванне перанесла на суботу, каб больш людзей змаглі прыехаць на мерапрыемства. І сапраўды гасцей прыехала шмат. Нечаста ў нашай краіне можна пабачыць столькі знакамітых людзей у адным месцы.

Можна было ўзяць аўтограф у знакамітых гасцей

Астаповіч і Шалкевіч падобныя як браты

Адкрыў урачыстасць Іосіф Навумчык, старшыня Віцебскай абласной арганізацыі Таварыства беларускай мовы. Ён адзначыў вялікі ўклад, які зрабіў у беларускую літаратуру Васіль Быкаў, а таксама звярнуў увагу на тое, што яго імя павінна навечна застацца ў памяці беларускага народа.

Потым выступіла Валянціна Уладзіміраўна – родная сястра беларускага класіка. Яна падзялілася сваімі ўспамінамі пра брата, распавяла пра яго дзіцячыя і юнацкія гады. Асабліва шчымлівым быў яе расповяд пра ваенныя гады, калі сям’я нічога не ведала пра лёс Васіля.

Выступіла таксама і прадстаўнік раённай улады намеснік старшыні Ушацкага райвыканкама Наталля Марковіч. Яе выступ быў цалкам беларускамоўным, што радуе. Што прыкра, дык тое, што сайт Ушацкага райвыканкама не мае беларускамоўнай версіі, нягледзячы на тое, што тут нарадзіліся Васіль Быкаў, Рыгор Барадулін, іншыя знакамітыя людзі Беларусі. Праўда, дзеля справядлівасці варта зазначыць, што ніводзін з суседніх з Глыбокім раёнаў такой версіі не мае. Глыбокае тут прыемнае выключэнне.

Пра сваё знаёмства з Васілём Быкавым распавялі Валянціна Барадуліна і Вольга Іпатава.

Валянціна Барадуліна і Зінаіда Бандарэнка

Уладзімір Някляеў аб’явіў прысутным пра тое, што з турмы на волю выйшаў Алесь Бяляцкі, што было вельмі радасна ўспрынята гасцямі свята. Потым паэт вельмі эмацыйна прачытаў свае вершы, прысвечаныя Васілю Быкаву і Алесю Бяляцкаму.

Былы кіраўнік Беларусі Мечыслаў Грыб у сваім выступе ўзгадаў, што Васіль Быкаў быў не толькі выдатным пісьменнікам, але і вялікім палітыкам.

Гэту думку падтрымаў і старшыня ТБМ Алег Трусаў, які ўзгадаў падзеі 1988 года, калі ствараўся Беларускі Народны Фронт “Адраджэнне”, у аргкамітэце якога самы непасрэдны ўдзел браў Васіль Быкаў.

Верш чытае Валерына Кустава

Напрыканцы мерапрыемства адбылося ўручэнне прэміі “За свабоду думкі”, намінантам якой сёлета стаў гарадзенскі бард Віктар Шалкевіч, які пасля парадваў прысутных сваімі песнямі.

Васіль Быкаў любіў васількі