Фэст “Меч Брачыслава” і ўрачыстасці Маці Божай Валадаркі Азёраў – анонс жнівеньскіх падзеяў у Браславе

Цягам аднаго жнівеньскага тыдня на Браслаўшчыне адбудзецца багата цікавых падзеяў. Урачыстасці ў гонар Маці Божай Браслаўскай, фэст сярэднявечнай культуры “Меч Брачыслава”, сустрэча каталіцкай моладзі і 100-годдзе касцёла ў мястэчку Іказнь.

15 – 18 жніўня адбудзецца VII дыяцэзіяльная сустрэча каталіцкай моладзі, якая будзе мець дэвіз “Вузел паклікання”. Сустрэча пачынаецца 15 жніўня а 17:30, рэгістрацыя пачынаецца а 16-й.

У межах сустрэчы адбудуцца два канцэрты – 15 жніўня а 21:00 будзе граць гурт Amore Vitae (Мінск), 16 жніўня а 20:00 – семінарыйны гурт “Подых Духа” (Пінск).

17 жніўня а 18:00 пачнецца фэст у гонар Маці Божай Браслаўскай. Падчас Імшы, якая пачнецца а 18-й, біскуп Уладзіслаў Блін надасць сакрамант бежмавання (мірапамазання) браслаўскім вернікам. Малітвы ў касцёле будуць працягвацца цэлую ноч.

18 жніўня а 11:00 пачнецца галоўная Імша Браслаўскага Фэсту. Падчас яе некалькі чалавек атрымаюць дыяканскія і святарскія пасвячэнні. Служыць Імшу будзе арцыбіскуп Клаўдыё Гуджэроці, Апостальскі Нунцый у Беларусі.

18 жніўня а 12:00 на Замкавай гары пачнецца фэст сярэднявечнай культуры “Меч Брачыслава”. Цэлы дзень на гары будуць рыцарскія турніры, выступы фолк-музычных гуртоў, дэманстраванне старадаўніх тэхналогій.

19 жніўня ў мястэчку Іказнь (Браслаўскі раён) будуць святкаваць 100-годдзе касцёла. На Імшы будуць маліцца кардынал Тэадор Маккарык (ЗША), арцыбіскуп Клаўдыё Гуджэроці і біскуп віцебскі Уладзіслаў Блін.

У той самы час, 19 жніўня на Замкавай гары будзе працягвацца фэст “Меч Брачыслава”. Пачатак - а 10-й, у праграме - рыцарская эстафета, турнір лучнікаў, сярэднявечныя танцы. Фэст скончыцца ў другой палове дня.

Чытай таксама:
VII Дыяцэзіяльная сустрэча моладзі. Праграма.
Урачыстасць Маці Божай Валадаркі Азёраў. Праграма.
Меч Брачыслава. Праграма.