Шведская пісьменніца Юя Вісландэр сустрэлася з браслаўскімі дзеткамі

Юя Вісландэр. Фота Галляша Сілявы, braslav-star.by

У музеі традыцыйнай культуры у Браславе 10 лютага адбылася сустрэча са шведскай дзіцячай пісьменніцай Юяй Вісландэр.

Юя піша цудоўныя казкі для дзетак на швецкай мове. Галоўны герой яе кніг – Малы, з якім кожны дзень адбываецца шмат цікавых прыгод. У малога ёсць сяброўка – Білан, з якой ён гуляе амаль кожны дзень. Увечары, калі Малы кладзецца спаць, ён расказвае аб сваіх прыгодах Мядзьведзіку.

Сустрэча пачалася са слоў вітання гасцей і невялікага успаміну пра знаёмых шведскіх дзіцячых герояў Астрыд Ліндгрэн Карласана і Пэпі Доўгаяпанчоха. Пасля выступіў пасол Швецыі у Беларусі Стэфан Эрыксан, які вельмі цёпла прывітаўся з маленькімі слухачамі.

Сама аўтарка распавяла пра свае кнігі і адказала на пытанні дзетак і дарослых, якіх прыйшло на сустрэчу таксама нямала. А пытанні былі розныя: хтосці цікавіўся, якая ў пісьменніцы самая таўстая кніжка, хтосьці - ці шмат трэба часу, каб напісаць твор.

Дзеткі на сустрэчы з Юяй Вісландэр. Фота Галляша Сілявы, braslav-star.by

Потым усім прысутным давялося паслухаць невялікую чытанку з кнігі “Мама Му чытае” у выкананні Надзеі Кандрусевіч, якая і зрабіла пераклады кніг Юі і Томаса Вісландэр са швецкай мовы. Гэтыя кнігі з’явіліся на беларускай мове, дзякуючы Амбасадзе Швецыі ў Беларусі.

Акрамя гэтага, пісьменніца разам са сваім мужам ствараюць песенькі па сюжэтах кніг, якія і прагучалі на сустрэчы па-беларуску у выкананні выхаванцаў музычнай школы.

Кніга Юі Вісландэр "Малы і Білан". Фота Галляша Сілявы, braslav-star.by

Напрыканцы тыя, хто прыйшоў на сустрэчу, атрымалі ў падарунак дыск з аўдыёкнігамі Юі і Томаса Вісландэра, было шмат ахвотных узяць аўтограф пісьменніцы. Нягледзячы на марознае надвор’е, сустрэча атрымалася цёплай, і вельмі цікавай.