У Браславе цяпер ёсць Вавілонская вежа

Браслаўская "Вавілонская вежа"

На гэтым тыдні ў двары Браслаўскай СШ №2 адбылося ўрачыстае адкрыццё art-аб’екта “Вавілонская вежа”, створанага падчас міжнароднага маладзёжнага пленэру “Сацыяльнае мастацтва дзеля сяброўства народаў” на хутары Калеснікі. Гасцямі ўрачыстасці і непасрэднымі арганізатарамі пленэру былі Ірына Заслаўская-Алерс і Бернхард Алерс. Вялікую цікавасць і захапленне выклікаў праект у школьнікаў, настаўнікаў, удзельнікаў урачыстасці. Усім, як мага хутчэй, хацелася даведацца пра “Вавілонскую вежу”. Ірына Заслаўская-Алерс патлумачыла сэнс праведзенай працы:

– Энтузіясты з Беларусі, Расіі, Украіны, Літвы, Італіі, Германіі, Польшчы стварылі “Вавілонскую вежу”, якую тысячагоддзямі не маглі пабудаваць нашы продкі з-за рознагалоссяў. Мы даказалі, што, нягледзячы на розныя сацыяльныя стасункі кожнага народа, мова мастацтва аб’ядноўвае. Юныя мастакі не пабаяліся паказаць свой талент і рэалізаваць яго. Важна і тое, што ўдзельнікі пленэру адчувалі падтрымку з боку Браслаўскага райвыканкама, аддзелаў адукацыі, культуры, аддзела па справах моладзі, БРСМ.

Арганізатары праекта зазначылі, што ў гэтым годзе ім удалося прыйсці да ўзаемавыгаднага супрацоўніцтва творчай моладзі розных краін. Дзякуючы беларускім пачынаючым мастакам Яраславу Татарынаву, Віктару Валачкову, Глебу Шомаву, Сашы Ракшы, Антону Матусевічу, Наташы Сурыновіч, якія былі ініцыятарамі ідэі і стваральнікамі праекта, сёння мы можам пабачыць вынік сацыяльнага мастацтва. Непасрэдны ўдзел у пабудове art-аб'екта прынялі юныя мастакі горада Браслава.

Аднак на гэтым супрацоўніцтва не заканчваецца. Ірына і Бернхард чакаюць новых ідэй ад моладзі. Яны спадзяюцца, што кола прыхільнікаў пленэру з кожным годам будзе расці, а новыя праекты будуць упрыгожваць вуліцы розных гарадоў.

Тэкст і фота Таццяны Прашкевіч

Крыніца: Браслаўская звязда