На Замкавай гары ў Браславе плануюць узнавіць старажытнае гарадзішча

Выява Браслаўскага замка на мапе ВКЛ 1613 г.

Цягам апошніх некалькіх гадоў "Весткі" неаднаразова звярталіся да тэмы добраўпарадкавання знакавага месца Браслава - Замкавай гары. Так, напрыклад, некалькі гадоў таму ўздымалася праблема "чорных плямаў" на Замкавай гары, якія з'явіліся ў выніку неабдуманай дзейнасці па спарадкаванні леташняга лісця.

А неўзабаве, пасля прыняцця плану мерапрыемстваў па стварэнні санаторна-турыстычнага комплекса ў Браслаўскім регіёне на 2011-2015 гады, распрацаванага Віцебскім аблвыканкамам па даручэнні Савета Міністраў, Замкавая гара сутыкнулася з іншай, больш сур'ёзнай небяспекай. Быў прапанаваны праект стварэння на старажытным гарадзішчы комплекса адноўленых фрагментаў драўлянай крэпасці - прасцей кажучы, праект пабудовы бутафорскага замка. Мясцовыя краязнаўцы выступілі супраць, сцвярджаючы, што ідэя збудаваць на гарадзішчы драўляны замак - пачварная і разбуральная, бо ніякіх гістарычных падстаў для аднаўлення замка не існуе. Асобныя будаўнічыя працы нанясуць шкоду рэальнаму гістарычнаму помніку.

Тым не менш, ідэя атрымала права на жыццё. Сёлета мінскае ААТ “Праект-рэстаўрацыя” распрацавала праект ахоўных зон помніка археалогіі Замкавай гары. І вось нарэшце "БелТА" афіцыйна паведаміла: Замкавую гару Браслава плануюць "оборудовать" (цытата) у 2014-2015 гг. У 2015 г. збіраюцца аднавіць на Замкавай гары "фрагменты старажытнага гарадзішча". Акрамя таго, тэрыторыю самой гары будуць добраўпарадкаваць.

Грошы на гэтыя мэты будуць выдаткаваныя з раённага бюджэту. Агулам цягам 2014 г. збіраюцца патраціць на "ўзнаўленне старажытнага гарадзішча" і ўпарадкаванне гары 600 мільёнаў рублёў, а ў 2015 г. - 1 мільярд рублёў (што праўда, незразумела, які будзе курс рубля праз 3-4 гады).

А што думаеце вы наконт "ўзнаўлення старажытнага гарадзішча" на Замкавай гары?