Магічная мапа Магілёва ад музыканта Рамана Жыгарава

Магілёўская рок-зорка распавядае пра месцы роднага горада, звязаныя з юнацкімі страхамі і начной варажбой.

Таксама ўдзельнік колішняга гурта “Глюкі”, а цяпер гітарыст і аўтар тэкстаў знакамітых Akute, расказаў пра магічныя месцы Магілёва, дзе адбываюцца дзіўныя знікненні.

Пячэрскі лесапарк

Гэта сапраўдны лес у межах горада, я памятаю, як аднойчы мы вырашылі там варажыць, гэта было ноччу, таму было надзвычай страшна. З тых часоў гэтае месца для мяне адно з самых магічных. Я памятаю, як мы чакалі там прыход Эры Вадаліва і выклікалі дэмана.

Старажытныя польскія могілкі

Яны вельмі прыгожыя, там ёсць сапраўдныя падземныя склепы. На могілках быў страшны ахоўнік, якога мы вельмі баяліся. Гэтыя могілкі існуюць і сёння, я вельмі часта каля іх праходжу і ўспамінаю.

Кухня Рамана Жыгарава

Гэта, напэўна, самае магічнае месца з усіх трох, там увесь час нешта знікае. Там знікае ежа, кубкі і нават час ад часу людзі.

У матэрыяле выкарыстоўваюцца ілюстрацыі Андруся Такінданга.

Што такое "Магічная Мапа"

Гэта праект кампаніі "Будзьма беларусамі!", інфармацыйнымі партнёрамі якой з'яўляецца сайт gorad.by. Мэта праекта ў тым, каб стварыць агульную, актуальную калектыўную гарадскую гісторыю Беларусі з існых адасобленых "пазлаў" — мясцінаў беларускіх гарадоў.

Пішыце пра свае "магічныя мясціны" у нашым горадзе

Магічная мапа павінна стварацца супольна. Таму gorad.by разам з кампаніяй "Будзьма" прапаноўвае магілёўцам стаць удзельнікамі праекта.

Дасылайце на нашу пошту [email protected], у каментарах ці на адрас кампаніі [email protected] (з пазнакай у тэме ліста «Магічная Мапа») спіс сваіх магічных месцаў, тых месцаў, якія маюць сваю гісторыю і патэнцыйна будуць цікавыя іншым жыхарам горада.

Дасылайце пералік разам з кароткім тлумачэннем: чаму гэтае месца для вас дарагое альбо чаму вы лічыце яго магічным, адметным. Найцікавейшыя аповеды будуць апублікаваныя (і аздобленыя малюнкамі Андруся Такіндага). Калі вы малюеце самі, дасылайце і свае малюнкі!