Галадоўка ў Горках

Выплаты заробленага патрабуе прадпрымальнік з Горак Андрэй Бажко ад перасоўнай механізаванай калоны №1 райцэнтру. Андрэй абвясціў галадоўку і стаў з плакатам ля ўваходу ў дзяржаўнае прадпрыемства.

Як сцвярджае Андрэй Бажко, цягам паўгода ПМК не разлічваецца за працу, якую выканала Андрэева прыватнае прадпрыемства на ўмовах субпадраду.

«Кіраўніцтва ПМК матывуе нявыплату нам грошай тым, што з ім не разлічваецца акцыянернае таварыства “Александрыя”. Мы займаліся ўнутраным аздабленнем катэджаў. Шпалеры клеілі, фарбавалі падлогу і гэтак далей. У мяне за паўгода вырасла запазычанасць перад маімі работнікамі. Я прасіў кіраўніцтва ПМК, каб пералічылі хоць колькі грошай, каб выплаціць заробкі людзям. У мяне няма іншага выйсця, як абвясціць галадоўку і стаць з плакатам ля ўваходу ў ПМК. Кіраўніцтва ПМК прызнае, што вінаватае мне, але нічога не робіць, каб разлічыцца. Калі я не выплачу заробкі людзям, мною зоймецца падатковая інспекцыя», — тлумачыць сітуацыю Андрэй Бажко.

Акцыю сваю прадпрымальнік распачаў а 17-й гадзіне, калі прыехала кіраўніцтва ПМК. «Да мяне падышоў начальнік ПМК і сказаў, што мае дзеянні выглядаюць смешна. І параіў ісці на плошчу Леніна, да райвыканкаму — маўляў, такія пытанні начальнік ПМК не разглядае. І пайшоў на нараду.

Яшчэ непадалёк ад мяне стаіць службовая машына з двума супрацоўнікамі міліцыі. Пакуль нічога не робяць. У руках я трымаю плакат: “ПМК-1, аддайце заробленае. Хачу есці”. Буду стаяць, пакуль не забяруць адсюль».

Ля ўваходу ў ПМК Андрэй Бажко прастаяў гадзіну. Калі начальства прадпрыемства сышло, ён вырашыў таксама згарнуць свой пікет. Заўтра зранку прадпрымальнік абяцае зноў прыйсці да ПМК і працягнуць акцыю.

Паводле рэдактаркі горацкай незалежнай газеты «УзГорак» Галіны Буднай, кіраўнік ПМК паабяцаў заўтра даць журналістам свае тлумачэнні сітуацыі з прыватным прадпрыемствам Андрэя Бажка.

svaboda.org