У памяць пра гераічнага студэнта

Сёння 25 сакавіка грамадзяне Горак і Дрыбіна ўсклалі кветкі на магілу мясцовага студэнта, які загінуў падчас паўстання пад кіраўніцтвам Кастуся Каліноўскага.

На тэрыторыі дэндрапарка БДСГА знаходзіцца пахаванне Войцеха Дамарацкага. Напрыканцы дзевятнаццатага стагоддзя ён вучыўся ў Горы-горацкім земляробчым інстытуце. У свае 23 гады хлопец не толькі атрымліваў адукацыю, але і займаўся падпольнай дзейнасцю супраць царскага рэжыму. Дамарацкі быў удзельнікам сакрэтнага студэнцкага камітэту, сябры якога рыхтаваліся да паўстання Каліноўскага. Камітэт быў створаны ў Горках у 1862 годзе. Акрамя Дамарацкага ў падпольную арганізацыю ўваходзілі В.Антановіч, С.Віскоўскі, С.Дымкевіч, З.Міткевіч, Р.Чарвінскі і іншыя. Хлопцы перыядычна выязджалі за горад і трэніраваліся ў стральбе, а таксама адкрылі для сялянскіх дзяцей народную школу, выкладанне ў якой вялося на беларускай мове.

24 красавіка 1863 года ў Горкі ўвайшоў атрад Людвіга Звяждоўскага, паплечніка Кастуся Каліноўскага, і абвясціў аб усталяванні ў мястэчку народнай улады. Змагароў падтрымалі студэнты мясцовага інстытута. Але падчас бою паўстанцы панеслі страты. Адным з забітых быў Войцех Дамарацкі, якога паплечнікі пахавалі на тэрыторыі акадэмічнага дэндрапарка. Толькі ў савецкі час на магіле гераічнага студэнта была пакладзена пліта з адпаведным надпісам.

З часам пахаванне Дамарацкага было занядбанае, а надмагільная пліта нават раскалолася. Адзінкі зазіралі сюды, каб ускласці кветкі ды прыбраць смецце. І толькі цяперашняе кіраўніцтва БДСГА аднавіла і добраўпарадкавала пахаванне, ўсталявала над ім помнік.

Сёння ў дзень абвяшчэння незалежнасці Беларускай Народнай Рэспублікі на магілу Дамарацкага прыйшлі людзі, каб ускласці кветкі і ўшанаваць хвілінай маўчання ўсіх, хто загінуў за Беларусь у розныя часы яе няпростай, але гераічнай гісторыі.