Пайшоў з жыцця Заслужаны работнік культуры БССР Віктар Балаханаў

­7 верасня 2014 года пайшоў з жыцця Заслужаны работнік культуры БССР, таленавіты хормайстар, аматар і прапагандыст народнай творчасці Віктар Яўстафіевіч Балаханаў.
Нарадзіўся 1 мая 1942 года ў Шклове. У 1970 годзе скончыў Гродзенскае музычнае вучылішча па спецыяльнасці «кіраўнік аркестра».
Сваю працоўную дзейнасць пачаў у 1965 годзе мастацкім кіраўніком Слаўгарадскага раённага Дома культуры і хормайстрам харавага калектыву, які праз два гады атрымаў ганаровае званне “народны самадзейны калектыў”.

­
­
У 1975 годзе па запрашэнню адміністрацыі Беларускага шыннага камбіната пераехаў у Бабруйск, дзе працаваў на пасадзе дырэктара клуба вытворчага аб’яднання “Бабруйскшына”.
Менавіта любоў да народнай песні стала галоўным сэнсам яго жыцця, творчасці і плённай працы. За гады сваёй дзейнасці Віктар Яўстафіевіч стварыў тры народных харавых калектыва. Акрамя гэтага ім было створана некалькі харавых калектываў ў Бабруйскім, Слаўгарадскім, Кіраўскім раёнах, хор медыцынскіх работнікаў медсанчасці «Бабруйскшына».
У 1978 годзе Балаханавым В.Я. на базе рэспубліканскага ўнітарнага прадпрыемства “Белшына” быў створаны харавы калектыў, якому ў 1981 годзе прысвоена званне “народны самадзейны калектыў”, а ў 2006 годзе - “Заслужаны аматарскі калектыў Рэспублікі Беларусь” народны хор Палаца мастацтваў г. Бабруйска.
У студзені 2004 года Віктар Яўстафіевіч стварыў харавы калектыў работнікаў філіяла 703 АСБ “Беларусбанк”, які з поспехам выступаў на пляцоўках горада і цэнтральнага апарата АСБ “Беларусбанк” (г. Мінск), як самастойны калектыў, так і сумесна з народным хорам народнай песні Палаца мастацтваў г. Бабруйска. Пад яго кіраўніцтвам гэтыя творчыя калектывы неаднаразова з’яўляліся пераможцамі шматлікіх гарадскіх, абласных, рэспубліканскіх, міжнародных фестываляў і конкурсаў.
Доўгі творчы шлях прайшлі такія праэкты, распрацаваныя Віктарам Яўстафіевічам, як: “Беларусь – мая ластаўка-песня”, “Дарогамі вайны”, “Песні ляцяць над краінай”, “Жанчынам Беларусі прысвячаецца”, “Цыкл духоўнай музыкі”, вянок беларускіх абрадавых песень, у якім асобнае месца займае “Беларускі вясельны абрад”, які трасліраваўся па беларускаму тэлебачанню.
Балаханаў В.Я. з 1988 года з’яўляўся членам Беларускага Саюза музычных дзеячаў. У 1989 годзе яму было прысвоена ганаровае званне “Заслужаны работнік культуры БССР”. У 2006 годзе быў абраны дэлегатам ІІІ Усебеларускага народнага сходу.
З 2008 года з’яўляўся галоўным хормайстрам Міжнароднага фестывалю народнага мастацтва “Вянок дружбы”, старшынёй вакальна-харавой секцыі Асацыяцыі музычных працаўнікоў Магілёўскай вобласці.
За шматгадовую, плённую дзейнасць у развіцці самадзейнага мастацтва Балаханаў В.Я. быў узнагароджаны Граматай Вярхоўнага Савета БССР, Знакам УЦСПС “За дасягнутыя поспехі ў самадзейным мастацтве”, Ганаровай граматай Федэрацыі прафсаюзаў Беларусі, Ганаровай граматай Савета Міністраў Рэспублікі Беларусь, Знакам “Выдатнік культурнага шэфства на сяле”. Неаднаразова ўзнагароджваўся Ганаровымі граматамі і каштоўнымі падарункамі Магілёўскага абласнога ўпраўлення культуры, Бабруйскага гарадскога і раённага выканаўчага камітэтаў.
У лістападзе 2010 года ў сувязі з 35-годдзем Заслужанага аматарскага калектыву Рэспублікі Беларусь хору народнай песні і 50-годдзем творчай дзейнасці Балаханаў В.Я. быў узнагароджаны Ганаровым знакам Беларускага прафсаюза работнікаў культуры, Ганаровымі граматамі Бабруйскага гарадскога Савета дэпутатаў і ўпраўлення культуры Магілёўскага аблвыканкама.
У 2011 года ўзнагароджан Ганаровай граматай Магілёўскага абласнога выканаўчага камітэта, спецыяльнай прэміяй імя Міхася Лынькова Бабруйскага гарвыканкама і падзячным лістом упраўлення Камітэта дзяржаўнай бяспекі Рэспублікі Беларусь па Магілёўскай вобласці.
Усе работнікі культуры горада, удзельнікі творчых калектываў выказваюць словы спачування сям’і пакойнага.
Бобруйский городской исполнительный комитет