Спынiлi непрыемную серыю

15 чэрвеня, Жодзіна, ст-н “Тарпеда”, 1100 гледачоў, суддзя – В.Севасцьянаў (Гродна), “Тарпеда-БелАЗ” Жодзіна – “Мінск” – 2:1. Галы: 34 хв., Сучкоў – 1:0; 54 хв., Кібук – 1:1; 60 хв., Глеб – 2:1.

“Тарпеда-БелАЗ”: Часноўскі, Чалядзінскі, Мендзі, Чараднічэнка, Сучкоў (77 хв., Платонаў Дзм.), Глеб (84 хв., Панкавец), Лявіцкі (65 хв., Селява), Шчагрыковіч, Казлоў, Ерхан, Васькоў.

Чым бліжэй фініш першага этапа чэмпіянату, тым больш узрастае кошт кожнага здабытага ачка, кожнай перамогі, асабліва калі сустракаюцца суседзі па становішчы ў табліцы.

А матч з “Мінскам” аказаўся менавіта такім. Вя-лізарная важнасць выніка гэтай сустрэчы адмоўна адбілася на дзеяннях аўтазаводцаў у стартавыя хвіліны. Яны грашылі недакладнымі перадачамі і індывідуальнымі памылкамі, дазволіўшы гараджанам некалькі раз усур’ёз патурбаваць Часноўскага. Дзякуй Богу, госці не здолелі скарыстацца перавагай, а вось тарпедаўцы літаральна свой першы галявы момант выкарысталі. Вячаслаў Глеб, які на гэты раз выйшаў у ролі нападаючага, накруціў двух сапернікаў і адкінуў мяч Мендзі, а той у сваю чаргу на Сучкова. Ад магутнага стрэлу Аляксея не выручыў і бездакорна дзей-нічаючы да гэтага Ўладзімір Бушма. Гол змяніў становішча на полі, ужо жодзінцы завалодалі ініцыятывай і не аддавалі яе да перапынку.

Другая палова выйшла значна больш багатай на яркія падзеі, што, безумоўна, прыйшлося да спадобы нешматлікім, але самым адданым прыхільнікам “Тарпеда-БелАЗ”. Менавіта яны, нягледзячы на чатыры паражэнні аўтазаводцаў запар на сваім полі, прыйшлі і дапамаглі нашым футбалістам спыніць вельмі непрыемную серыю. Але спачатку мінчанам удалося выраўняць лік. Скарыстаўшыся памылкай нашых абаронцаў, Віталь Кібук аднавіў не толькі лік, але і на-дзеі сталічнай дружыны. Раўнавага, да радасці жодзінцаў, праіснавала нядоўга. Вячаслаў Глеб, узяўшы ў партнёры Сучкова, разарваў абарону і прымусіў Бушму ў другі раз даставаць мяч з уласных варот.

Пасля гэтага, карыстаючыся разгубленасцю гасцей, тарпедаўцы павінны былі давесці лік да буйнога. Але спачатку Васькоў, які апынуўся адзін супраць варот, трапіў у іх каркас, а потым два ўдары ва ўпор Шчагрыковіча, неверагодна як, але прынялі на сябе абаронцы. Не здолеўшы выкарыстаць такія цудоўныя моманты, жодзінцы працягнулі інтрыгу да апошняй хвіліны. Шансы змяніць лік былі ў абодвух сапернікаў, але… Такім чынам, аўтазаводцы атрымалі вельмі важную ва ўсіх сэнсах перамогу.

А на гэтым тыдні нашым землякам прыйдзецца правесці адразу два матчы. Спачатку ў сераду ў Магілёве супраць мясцовага “Дняпра”, а ў нядзелю, 23 чэрвеня, на стадыёне “Тарпеда” аўтазаводцы будуць прымаць наваполацкі “Нафтан”. Пачатак у 18 гадзін 30 хвілін. Так што да сустрэчы на футболе.

Сяргей Пузанкевіч