З нябёсаў спусціліся на зямлю

17 красавіка, Жодзіна, стадыён “Тарпеда”, 1900 гледачоў, суддзя М. Лаўскі (Гомель), “Тарпеда-БелАЗ” – “Шахцёр” Салігорск – 0:3. Галы: 24 хв, Асіпенка – 0:1; 70 хв, Сітко – 0:2; 86 хв, Рыас – 0:3.

“Тарпеда-БелАЗ”: Часноўскі, Чалядзінскі, Чараднічэнка, Панкавец, Сучкоў, Селява, Глеб (57 хв, Яцкевіч), Шчагрыковіч, Казлоў (72 хв, Мендзі), Васькоў, Сакрэт (82 хв, Каршакевіч).

Каб не матч у Гродне мясцовай дружыны з “БАТЭ”, то гэты паядынак можна смела назваць гульнёй тура, бо сустракаліся каманды-лідэры, а пераможца магчыма і наогул мог узначаліць табліцу чэмпіянату. І калі для гарнякоў такое становішча даволі звыклае, то аўтазаводцам прымерка лідэрскай майкі пакуль у навіну.

Пачатак гульні выдаўся нярвовым і небагатым на яркія моманты. Сапернікі яўна прыглядваліся адзін да аднаго. Статус гаспадароў вымушаў тарпедаўцаў дзейнічаць больш актыўна, але ўсур’ёз патурбаваць галкіпера салігорцаў Цыгалку яны здолелі толькі аднойчы. Сакрэт адгукнуўся на прастрэл Шчагрыковіча і ўдарыў злёту, на жаль, мяч крыху размінуўся з “рамкай”. А вось госці і наогул нанеслі за першыя сорак хвілін адзіны ўдар, ды і ўдарам яго назваць можна з нацяжкай.Толькі вось стаў ён галявым. Чараднічэнка з Асіпенкай вялі барацьбу, мяч трапіў у Часноўскага, адскочыў да нападаючага “Шахцёра” і ад таго трапіў у вароты.

Пасля перапынку аўтазаводцы распачалі шмат намаганняў, каб выраўняць лік. Асабліва горача ў штрафной пляцоўцы гарнякоў стала пасля таго, як замесі інэртнага Глеба выйшаў Яцкевіч. Здавалася, яшчэ крыху і поспех прыйдзе на жодзінскую вуліцу. Перадача і разрэз Сучкова знайшлі Сакрэта, той нават абыграў галкіпера, але, на вялікі жаль, не трапіў у пустыя вароты. І вось тут, прыжаўшыся да ўласнай “рамкі”, салігорцы здолелі адказаць вострым контрвыпадам. Сітко  прамчаўся па флангу, абыграўшы пры гэтым двух нашых абаронцаў, і дакладна прабіў у дальні вугал. Пасля гэтага нашы землякі працягвалі спробы выправіць сітуацыю, але рабілі гэта больш па інэрцыі. Асабіста мне здалося, што ўпэўненасць ва ўласных сілах пачала пакідаць некаторых тарпедаўцаў, а за пяць хвілін да фінальнага свістка гарнякі са штрафнога ўдара пры дапамозе рыкашэта зрабілі лік буйным. Што цікава, за ўсю гульню яны нанеслі ўсяго тры ўдары ў створ варот, і ўсе тры, на жаль, сталі галявымі. Будзем спадзявацца, што паражэнне, як сказаў Ігар Крывушэнка, апусціць некаторых футбалістаў з нябёсаў на зямлю. Каманда і трэнерскі штаб зробяць пра-вільныя высновы, і дзве наступныя гасцявыя гульні з “Гомелем” і брэсцкім “Дынама” прынясуць станоўчыя эмоцыі.

А ў панядзелак у Гомелі “Тарпеда-БелАЗ” згуляла з  мясцовым клубам унічыю з лікам  0:0. Падрабязнасці ў наступным нумары. Табліца чэмпіянату пасля пятага тура выглядае наступным чынам.

Сяргей Пузанкевіч