Футбольны сезон хутка пачнецца

Ну вось і завяршаецца апошні зімні месяц, а значыць, хутка наступіць вясна і пачнецца футбольны сезон. Футбалісты “Тарпеда-БелАЗ” працягваюць мэтанакіраваную падрыхтоўку. Па выніках першага турэцкага збору глаўкам аўтазаводцаў Ігар Крыушэнка адзначыў, што ўсё запланаванае было выканана, хлопцы вытрымалі вялікі аб’ём нагрузак, і ўжо працэнтаў на 80 пачынае выяўляцца асноўны склад каманды.

Вяртанне ў Беларусь аказалася для тарпедаўцаў нядоўгім, на радзіме яны правялі толькі адзін тыдзень і 23 лютага зноў узялі курс на Турцыю. У параўнанні з першым зборам у складзе жодзінцаў адбыліся пэўныя змены. Юрыю Каралюку ў бліжэйшыя дні будзе зроблена аперацыя, па медыцынскіх паказчыках не ляціць разам з камандай Павел Платонаў, ну а Вячаславу Яраслаўскаму шукаюцца іншыя варыянты працаўладкавання. Новыя кантракты з клубам падпісалі 25-гадовы нападаючы Дзмітрый Гомза, які ў прошлым годзе, гуляючы за “Віцебск”, забіў 16 мячэй, і паўабаронца Яўген Шыдлоўскі, які ў мінулым годзе знаходзіўся ў арэндзе ў “Лідзе”.

“Тарпеда-БелАЗ” на гэты раз накіроўваецца на анталійскае ўзбярэжжа ў мястэчка Сідэ, дзе будзе грунтавацца ў гатэлі “Blue Waters”. У выяздным складзе 23 футбалісты: варатары Чэсноўскі, Пяцігорац, Сцяпанаў, абаронцы Каршакевіч, Казлоў, Панкавец, Пракопчык, Чэлядзінскі, Чэрэднічэнка, Ерхан, паўабаронцы Васькоў, Ігнаценка, Лявіцкі, Мендзі, Селява, Сучкоў, Шыдлоўскі, Шчэгрыковіч, нападаючыя Глеб, Гомза, Яцкевіч, Васкабойнікаў, Дзм. Платонаў. Ёсць патэнцыяльныя навічкі: абаронца Юліан Ерхан (1986 г.н.), маючы вопыт выступленняў за маладзёжную і нацыянальную зборныя Малдовы, і нападаючы зборнай Эстоніі Уладзімір Васкабойнікаў (1983 г.н.), вядомы па выступленнях за “Хімкі” і маскоўскае “Тарпеда”.

Збор будзе працягвацца два тыдні, і за гэты час нашы землякі запланавалі правесці шэсць спарынгаў, першы з якіх павінен адбыцца 26 лютага супраць латвійскага “Вэнтспілса”. Бу-дзем з нецярпеннем чакаць навін з Турцыі.

Ну а напрыканцы прыемная навіна для сапраўдных прыхільнікаў “Тарпеда-БелАЗ” – 11 сакавіка ў ДК БелАЗа адбудзецца сустрэча кіраўніцтва, трэнераў і футбалістаў каманды з заўзятарамі. Пачатак а 18 гадзіне, уваход свабодны.

Сяргей Пузанкевіч

При использовании материалов с сайта ссылка на источник www.zhodinonews.by обязательна!