Тарпедаўцы занялі ўстойлівае апошняе месца

“Тарпеда-БелАЗ”: Чэсноўскі, Чэлядзінскі, Яраслаўскі (69 хв., Селява), Ланько, Дземідовіч (63 хв., Яцкевіч), Шчэгрыковіч, Салавей, Казлоў, Мендзі, Каршакевіч, Лашанкоў (60 хв., Вяргейчык).

Свабодны ўваход і звышпрынцыповасць матча для абодвух сапернікаў здолелі сабраць адну з найбольшых аўдыторый на жодзінскім стадыёне ў гэтым сезоне. І менавіта заўзятары абе-дзвюх каманд былі аднымі з галоўных персанажаў сустрэчы. Фанаты “Дынама” высадзілі ў Жодзіне дэсант ледзь не ў адну тысячу чалавек і запомніліся не толькі гучнай падтрымкай, але і фінальным фаер-шоу. Прыхільнікі аўтазаводцаў імкнуліся ні ў чым не саступаць сваім візаві і вырашылі ўзяць не колькасцю, а якасцю. Яны падрыхтавалі вялізарны банер, дзе нагадалі сённяшнім тарпедаўцам, што клуб мае багатую гісторыю, і заклікалі іх гуляць сэрцам.

Як ўжо казалася вышэй, і мінчанам, і жодзінцам перамога была неабходна як паветра. Дынамаўцам толькі вікторыя забяспечвала працяг барацьбы за бронзавыя медалі, ну а аб жаданні аўтазаводцаў пакінуць апошняе месца ў табліцы пісалася не адзін раз.

Новы рулявы “Тарпеда-БелаЗ” Ігар Крыушэнка меў не так шмат часу, каб падрабязна пазнаёміцца з новымі падапечнымі, таму стартавы склад, улічваючы крыўдную траўму Васькова, аказаўся даволі прагназуемым.

З першых хвілін ініцыятывай завалодалі госці, трэба адзначыць, жодзінцы не вельмі гэтаму працівіліся, спадзяючыся, мабыць, на контратакі, якія па ходу сезона ўжо прыносілі плён. Лагічна, што пераважная колькасць падзей разгортвалася на нашай палове поля. Увесь час прыходзілася працаваць тарпедаўскім абаронцам і Чэсноўскаму. Дарэчы, забягаючы крыху наперад, менавіта ўпэўненая гульня нашага галкіпера не дазволіла мінчанам зрабіць лік буйным. А вось наладзіць камбінацыйныя дзеянні нашым землякам ніяк не ўдавалася з-за вя-лікай колькасці недакладных перадач і цяжкавытлумачальных памылак. Таму варатару мінчан Аляксандру Суліме ўступаць у справу прыходзілася рэдка. Ён упэўнена справіўся з дальнім “стрэлам” Мендзі і бездакорна дзейнічаў падчас стандартаў.

Пасля перапынку, даведаўшыся, мабыць, аб ходзе паядынку ў Гомелі, “бела-блакітныя” пайшлі наперад яшчэ большымі сіламі. Абарончыя рэдуты аўтазаводцаў пачалі трашчаць. Праўда, неўзабаве жодзінцы стварылі найбольш востры момант. Шчэгрыковіч прастрэліў з фланга, Ланько замыкаў… на жаль, мяч самую дробязь размінуўся з варотамі. А вось дынамаўцы стваралі момант за момантам і дабіліся свайго. Розыгрыш вуглавога, галава капітана Драгуна і мяч у сетцы. Гаспадары паспрабавалі адыграцца, але… прапусцілі яшчэ адзін гол з пенальці. Змагацца пасля гэтага ўжо не было сіл. А мінчане, даведаўшыся аб паражэнні “Гомеля”, пасля фінальнага свістка прымалі віншаванні з бронзавымі медалямі.

У апошнім туры 25 лістапада аўтазаводцы адпраўляюцца ў Гродна, праўда, сезон на гэтым, мабыць, не скончыцца, і 29 лістапада і 2 снежня іх будуць чакаць дзве перахадныя сустрэчы з ”Гарадзеяй”.

Сяргей Пузанкевiч