Галоўным трэнерам “Тарпеда-БелАЗ” прызначаны Ігар Крыушэнка

Перад матчам з “Гомелем” кіраўніцтва клуба адправіла Вадзіма Бразоўскага ў адпачынак, але гэта хірургічная мера, як мы ўжо ведаем, не прынесла плёну. І тады былі арганізаваны яшчэ больш радыкальныя дзеянні. На пасаду галоўнага трэнера прызначаны вопытны беларускі спецыяліст Ігар Крыушэнка. У яго паслужным спіску два “золата” 2006 і 2007 года, калі ён кіраваў БАТЭ, “серабро” 2008-га разам са сталічным “Дынама” і выхад у прэм’ер-лігу Расіі і ў Лігу Еўропы на чале навасібірскай “Сібіры”. У яго распараджэнні апынулася індывідуальна даволі моцная, але псіхалагічна надломленая каманда і дзесяць дзён да наступнага матча з мінскім “Дынама”.

Панікі ў стане аўтазаводцаў няма, усе цудоўна разумеюць, у якую складаную сітуацыю трапіла каманда. Таму, будзем спадзявацца, прыкладуць усе сілы, каб пакінуць апошняе месца табліцы і такім чынам пазбегнуць пераходных гульняў.

Буйная перамога барысаўчан над “Мінскам” (5:1) дазволіла нашым геаграфічным суседзям традыцыйна датэрмінова святкаваць чарговае чэмпіёнства. Яшчэ адна каманда з Мінскай вобласці салігорскі “Шахцёр” пасля разгрому ў гасцях гродзенскага “Нёмана” гарантаваў сабе сярэбраныя медалі. А вось барацьба за “бронзу” яшчэ працягваецца, нават нягледзячы на перамогу дынамаўцаў над сваім прамым канкурэнтам “Гомелем” з лікам 1:0. У палешукоў у запасе засталіся дзве гульні, а ў сталічных футбалістаў толькі адна – у Жодзіне. Суседзі ж тарпедаўцаў па турнірнай табліцы праводзілі матчы паміж сабой. “Нафтан” ў Брэсце атрымаў мінімальную перамогу – 1:0 і  забяспечыў сабе захаванне прапіскі ў вышэйшай лізе. Матч паміж “Белшынай” і “Славіяй” завяршыўся нулявой нічыёй.

Мабыць, неабходна нагадаць, з кім яшчэ прыдзецца згуляць аўсайдэрам чэмпіянату:

“Белшына”: “Шахцёр” (г), “Гомель” (д).

“Славія”: БАТЭ (д), “Брэст” (г).

“Брэст”: “Мінск” (г), “Славія” (д).

“Тарпеда-БелАЗ”: “Дынама” (д), “Нёман” (г).

Такім чынам, апошнюю дамашнюю сустрэчу аўтазаводцы правядуць 17 лістапада ў суботу супраць мінскага “Дынама”. Пачатак а 14 гадзіне. Уваход свабодны.

І, напрыканцы… Як вядома, сябры пазнаюцца ў бядзе. Сапраўды, тарпедаўцы перажываюць цяжкія часы і ім, як ніколі, неабходна падтрымка, так што ўсе на стадыён.

Сяргей Пузанкевіч