Тарпедаўцам зусім не шанцуе

4 кастрычніка, Гомель, ст-н “Цэнтральны”. 2300 гледачоў, суддзя – В.Вялічка (н/к, Мінск), “Гомель” – “Тарпеда-БелАЗ” – 3:0. Галы: 27 хв., Казека – 1:0; 63 хв., Шэракоў – 2:0 (з пенальці); 90 хв., Шэракоў – 3:0 (з пенальці).

“Тарпеда-БелАЗ”: Парэчын, Чэлядзінскі, Яраслаўскі, Ланько (87 хв., Яцкевіч), Вяргейчык, Казлоў, Мендзі, Васькоў, Каршакевіч, Селява (75 хв., Дземідовіч), Лашанкоў.

Матч у Гомелі праходзіў у нядзелю, а ў суботу ў Наваполацку мясцовы клуб сенсацыйна перамог БАТЭ і пакінуў апошняе месца ў табліцы. Цяпер ад аўтазаводцаў, дакладней, ад іх супрацьстаяння з гамяльчанамі, залежыла, хто апусціцца на самае дно. Нашым землякам, як кроў з носу, патрэбна была перамога, але і гаспадары, якія вядуць барацьбу за медалі, таксама марылі толькі аб вікторыі. Такім чынам, абодва сапернікі былі як ніколі матывіраванымі.

На матч з гамяльчанамі жодзінцаў вывеў Аляксандр Марцёшкін, бо, па словах кіраўніцтва, у Вадзіма Бразоўскага ўзніклі праблемы са здароўем. Істотныя змены адбыліся ў стартавым скла-дзе. Так, месца ў варотах заняў Дзяніс Парэчын; упершыню з пачатку гульнi на поле выйшаў Аляксандр Селява, а вось Арцём Салавей з-за рэцыдыва траўмы застаўся дома. Галоўнай праблемай гаспадароў з’яўлялася стомленасць, бо гэта была ўжо другая сустрэча за чатыры дні. З першых хвілін бела-зялёныя паспрабавалі, як кажуць, узяць быка за рогі і вялікімі сіламі пайшлі наперад. Тарпедаўцы здолелі стрымаць стартавы націск і адсунуць гульню ад нашых варот. Праўда, да пагроз уладанням Бушмы справа даходзіла вельмі рэдка. Так, мне найбольш запомніўся толькі крыху недакладны ўдар Вяргейчыка. А вось гамяльчане сваю тэрытарыяльную перавагу здолелі ператварыць у матэрыяльную. Да гола прывёў дальні ўдар Казекі, з якім не справіўся Парэчын.

Пасля перапынку ўжо жодзінцы паспрабавалі дыктаваць умовы, але зарабілі адзінаццацімятровы ўдар у свае вароты. Эпізод з нападаючым гамяльчан і Парэчыным, на мой погляд, быў вельмі спрэчны, але суддзя свой выбар зрабіў – пенальці Шэракоў прабіў моцна і дакладна. Аўтазаводцы сталі шукаць контраргументы: Вяргейчык замыкаў галавой прастрэл, але на баку гаспадароў згуляла перакладзіна. А вось гамяльчане ледзь не адзіны свой шанс рэалізавалі. Прарыў па флангу недазволеным прыёмам спыніў Дземідовіч, які выйшаў на замену. Як вынік – яшчэ адзін пенальці. Шэракоў б’е ў той жа вугал, і зноў Парэчын да мяча не дацягнуўся. Буйное паражэнне, безумоўна, не выцякала з ходу матча, але тое, што “Гомель” аказаўся мацней, факт, як кажуць, медыцынскі.

Гэта паражэнне апусціла “Тарпеда-БелАЗ” на апошняе месца ў табліцы.

Наступны тур наша каманда прапускае, і таму чарговую гульню “Тарпеда- БелАЗ” правядзе 17 лістапада ў Жодзіне супраць сталічнага “Дынама”. Пачатак а 14 гадзіне.

Сяргей Пузанкевіч