Футбол. Спынілі непрыемную серыю

7 кастрычніка, Жодзіна, ст-н “Тарпеда”, 700 гледачоў, суддзя – М.Лаўскі (н/к, Гомель), “Тарпеда-БелАЗ” – “Мінск” – 1:0. Гол: 75 хв., Васькоў – 1:0. “Тарпеда-БелАЗ”: Чэсноўскі, Чэлядзінскі, Яраслаўскі, Ланько (46 хв., Вяргейчык), Шчэгрыковіч, Рыжко, Салавей, Казлоў, Мендзі, Васькоў (86 хв., Яцкевіч), Лашанкоў (84 хв., Карповіч).

Сапернікі дзеляцца на зручных і нязручных, дык вось сталічны клуб у гэтым сезоне тройчы пацярпеў паражэнне ад аўтазаводцаў. Уявіце, нашы землякі з дваццаці чатырох ачкоў дзевяць, а гэта больш адной трэці, набралі ў матчах з “Мінскам”. Збег абставін, ці сапраўды мінчане з’яўляюцца зручным сапернікам для “Тарпеда-БелАЗ”?

Да гэтый гульні каманды падыйшлі ў дыяметральна супрацьлеглым настроі. Госці набралі даволі добры ход і нават задумаліся аб бронзавых медалях, а вось жодзінцы ўжо амаль тры месяцы не ведалі смаку перамог.

Сталічны клуб настройваўся выключна на перамогу, і Вадзім Скрыпчанка, што бывает даволі рэдка, з першых хвілін выпусціў на поле двух нападаючых. Праўда, траўма Ковеля ўжо на дзясятай хвіліне крыху зблытала мінчанам карты. Тарпедаўцы ж таксама паспрабавалі здзівіць гасцей. У лінію атакі быў выстаўлены Салавей, а напарнікам Мендзі ў цэнтры паўабароны стаў Шчэгрыковіч.

Адразу хочацца адзначыць, што матч у прамым эфіры трансліраваўся па беларускім тэлебачанні, і пераважная большасць гараджан мела магчымасць убачыць гульню як на свае вочы на стадыёне, так і на блакітным экране. Таму падрабязна пераказваць ход падзей, я лічу, не патрэбна. У першай палове вызначаліся два моманты. Дзесьці на пятнаццатай хвіліне вельмі горача было ля нашых варот. Госці падалі чатыры вуглавыя запар, мяч некалькі раз быў у адным кроку ад варот, але Чэсноўскі і абаронцы выстаялі. Потым аўтазаводцы здолелі арганізаваць некалькі добрых атак і нават забіць гол, справядліва незалічаны з-за становішча па-за гульнёй.

Неўзабаве пасля перапынку жодзінскія вароты выратавала перакладзіна. Мінчане прыбралі ініцыятыву да сваіх рук і працягвалі атакаваць. Нашы землякі сканцэнтравалі сілы на абароне і чакалі свайго шансу ў контратаках. І за пятнаццаць хвілін да фінальнага свістка дачакаліся.

Тарпедаўцы ў цэнтры поля перахапілі мяч, і Лашанкоў дакладнай і своечасовай перадачай накіраваў Васькова на спатканне з Логвінавым. Наш           паўабаронца ўсё зрабіў як патрэбна, вырваўся на аператыўную прастору і, не збліжаючыся з галкіперам, адправіў мяч у вароты.

Пасля гэтага сталічныя футбалісты з падвоеным жаданнем пайшлі наперад, даючы, такім чынам, аўтазаводцам яшчэ больш шансаў для контргульні. Але гледачы больш галоў не ўбачылі і сталі сведкамі першай перамогі тарпедаўцаў за тры апошнія месяцы.

Цяпер нашых чакае матч 1/8 фінала Кубка Рэспублікі Беларусь 13 кастрычніка ў Барысаве супраць мясцовага БАТЭ.

Сяргей Пузанкевіч