Футбол: Сціплы падарунак

“Тарпеда-БелАЗ”: Чэсноўскі, Чэлядзінскі, Яраслаўскі, Ланько, Яцкевіч, Шчэгрыковіч, Рыжко, Казлоў, Мендзі (79 хв., Рабцаў), Васькоў (90 хв., Вяргейчык), Карповіч (54 хв., Хлебасолаў).

Каляндар чэмпіянату распарадзіўся такім чынам, што ў адзін з самых галоўных святаў нашага горада – Дзень машынабудаўніка – футбалісты “Тарпеда-БелАЗ” выступалі ў гасцях супраць наваполацкага “Нафтана”. Але, нават знаходзячыся больш чым у двухстах кіламетрах ад Жодзіна, аўтазаводцы цудоўна разумелі, што іншага выніку акрамя перамогі ў гэты дзень ад іх не чакаюць. На жаль, паўнацэннага падарунку белазаўцам не атрымалася.

Як і папярэдні матч з “Брэстам”, паядынак з “Нафтанам”, улічваючы суседскае становішча па табліцы, можна смела назваць гульнёй за шэсць ачкоў. Сапернікі разумелі зверхважнасць выніка, таму настройваліся на сустрэчу, як на апошні бой. Вярнуўся ў стартавы склад адбыўшы дыскваліфікацыю Паскаль Мендзі, з гэтым звязваліся пэўныя спадзяванні на ўзмацненне нашай паўабароны. Карэктывы ў склад трэнерскі штаб аўтазаводцаў быў вымушаны зрабіць і ў сувязі з хваробай Салаўя і Лашанкова.

Матч актыўней пачалі жодзінцы, толькі вось большасць іх атак спынялася ля межаў штрафной пляцоўкі. Але неўзабаве нафтанаўцы, мабыць, успомнілі, што яны ўсё ж гаспадары і паспрабавалі перахапіць ініцыятыву. Не сказаць, што ім гэта ўдалося, толькі лік яны здолелі адкрыць. Гэта быў першы небяспечны момант ля нашых варот і ўзнік ён літаральна на роўным месцы. Навес у нашу штрафную пляцоўку спыніў Мендзі, але мяч  ён здолеў вынесці недалёка, і Букаткін метраў з дваццаці пяці адправіў прадмет гульні дакладна ў правы ад галкіпера ніз. На жаль, Чэсноўскі не выратаваў каманду.

Пасля гэтага навапалачане пачалі дзейнічаць яшчэ больш асцярожна і тым самым значна ўскладнілі задачу тарпедаўцам, бо, як добра вядома, лепш нашы землякі дзейнічаюць на контратаках. А так ў асноўным мяч трымаўся паміж штрафнымі пляцоўкамі. Узарваць праходзячы не па жодзінскім сцэнарыі ход падзей спрабавалі Шчэгрыковіч сваімі індывідуальнымі дзеяннямі і Васькоў імклівымі праходамі па флангу. Толькі вось усур’ёз патурбаваць Раманюка аўтазаводцам да перапынку не ўдалося.

Пачатак другога тайма прынёс поспех тарпедаўцам. Да гэтага прывёў розыгрыш вуглавога. Пасля падачы ў выкананні Яраслаўскага мяч замітусіўся ў штрафной пляцоўцы, і калі з ударам Шчэгрыковіча варатар справіўся, то супраць стрэла Чэлядзінскага нічога не змог зрабіць.

Зразумела, нічыйны лік не ўваходзіў у планы абедзвюх каманд, і галоўныя трэнеры заменамі паспрабавалі павялічыць атакуючы патэнцыял сваіх калектываў. На жаль, Хлебасолаў і Вяргейчык не здолелі ўзмацніць гульню. Найбольш рэальны шанс вырваць перамогу мелі гаспадары, але Зубовіч не змог перагуляць Чэсноўскага. А ўжо ў дададзены арбітрам час перад самым фінальным свістком Рыжко пасля розыгрышу вуглавога прабіў побач са штангай.

Цяпер жодзінцы на сваім полі 7 кастрычніка, у нядзелю, будуць прымаць “Мінск”. Пачатак а 14 гадзіне. Так што да сустрэчы на футболе.

Сяргей Пузанкевіч