Интрыга захавалася

18 жнiўня, Жодзіна, ст-н “Тарпеда”, 2900 гледачоў, суддзя – С.Цынкевіч )Асіповічы), “Тарпеда-БелАЗ” – “Нёман” Гродна – 1:1.

“Тарпеда-БелАЗ”: Хамутоўскі, Чалядзінскі, Міняна, Чараднічэнка (41 хв., Казлоў), Панкавец, Селява (76 хв., Глеб), Лявіцкі, Шчагрыковіч, Яцкевіч, Васькоў (60 хв., Сучкоў), Казанцаў.

Перамога ў гэтым матчы стопрацэнтна забяспечвала аўтазаводцам месца ў першай шасцёрцы каманд, таму ніхто не марыў ні пра што іншае. Але і ў гродзенцаў была аналагічная задача. Кіраўніцтва нашага клуба, каб забяспечыць як мага лепшую падтрымку, зрабіла ўваход на стадыён свабодным і, трэба адзначыць, гэта прынесла плён.

Гледачоў сабралася не менш, чым у матчы зборных Беларусі і Чарнагорыі, а вось гукавая і эмацыянальная падтрымка была на парадак лепш. І гэта зразумела, бо тарпедаўцы сваёй шчырай гульнёй з самага пачатку ўдыхнулі ў трыбуны пах перамогі. Ужо першая хвіліна матча магла быць выніковай, але ўдар ва ўпор Яцкевіча не стаў невырашальнай задачай для галкіпера гродзенцаў Чэрніка.

Тарпедаўцы працягвалі націск, і галявыя моманты ўзнікалі адзін за адным. Толькі вось да пары ўсе атакуючыя імкненні нашых землякоў спыняў бліскуча гуляўшы варатар “Нёмана”, але і ён не здолеў выратаваць сваіх партнёраў пасля ўдара Селявы метраў з дваццаці. Такую змястоўную і якасную гульню нашых землякоў, якую яны прадэманстравалі ў першыя дваццаць хвілін, прыходзіцца бачыць не часта. Шчыра кажучы, прыемна было назіраць за дзеяннямі футбалістаў нашай каманды, а вось госці ў гэты час выглядалі зусім разгубленымі. У іх нічога не атрымлівалася, і, як след – да ўладанняў Хамутоўскага мяч дастаўляўся лічаную колькасць разоў. Па гэтых хвілінах было незразумела, за кошт чаго “Нёман” здолее вырваць перамогу. Іх трэнерскі штаб, незадаволены дзеяннямі сваіх падапечных, яшчэ перад перапынкам правёў адразу двайную замену.

У другім тайме сітуацыя змянілася. Мабыць, сказалася старая тарпедаўская хвароба, чорна-белыя пачалі гуляць на захаванне ліку, даючы сваім гасцям магчымасць прыйсці ў сябе і прад’явіць контраргументы. Чым яны, на вялікі жаль для жодзінцаў, і скарысталіся. Да гола ў адказ прывёў розыгрыш штрафнога. З першым ударам Хамутоўскі справіўся, але адбіў мяч перад сабой, і абаронца гродзенцаў Садоўнічы пераправіў мяч у вароты. Пасля гэтага госці вырашылі за лепшае сканцэнтраваць усе намаганні на захаванні ліку, а вось аўтазаводцы спрабавалі вырваць перамогу.

На жаль, усе тры жодзінскія замены аказаліся вымушанымі і былі звязаны з траўмамі і пашкоджаннямі нашых гульцоў. А вось тыя, хто ўвайшоў у гульню, не здолелі ўзмацніць атаку. Усё мог вырашыць ужо ў дададзены арбітрам час Вячаслаў Глеб, але яго ўдар прыйшоўся ў штангу.

Нічыя, з аднаго боку, захавала абедзвюм камандам шансы на пападанне ў першую шасцёрку, з другога – цяпер не ўсё ў нашых руках. У апошнім туры аўтазаводцы будуць гуляць у Барысаве, “Белшына” дома прымае “Славію”, а “Нёман” у Гродне пазмагаецца з мінскім “Дынама”. Жодзіна задаволіць ці ўласная перамога, ці страта ачкоў адным з канкурэнтаў.

Дублёры ж свой матч таксама згулялі ўнічыю – 2:2 (Раманюк, Пракопчык).

А 25 жніўня ў нядзелю ў матчы 1/8 Кубка Беларусі “Тарпеда-БелАЗ” на сваім полі будзе прымаць салігорскі “Шахцёр”. Пачатак гульні ў 17 гадзін 30 хвілін.

Сяргей Пузанкевіч