Гісторыю пішам разам

Шаноўныя чытачы! Выйшаў фінальны нумар “Кур’ера” адыходзячага ў гісторыю 2012 года. Гэты нумар – чарговая цаглінка ў справе стварэння летапісу грамадска-палітычнага, сацыяльна-эканамічнага, культурнага, спартыўнага накірункаў жыцця нашага рэгіёна. Менавіта вам рабіць высновы, наколькі якаснай з’яўляецца гэтая цаглінка, ці не занадта многа ў ёй тых складнікаў, якія робяць малюнак нашага жыцця не адпавядаючым рэчаіснасці.
Са свайго боку толькі адзначым, што рэдакцыя старалася “выпякаць” гэты інфармацыйны прадукт пад назвай “Кур’ер”, прытрымліваючыся ў першую чаргу стваральных імпульсаў. Мы стараліся неабыякава рабіць сваю справу – займацца бізнесам. Шчыра прызнаемся, што без вашай падтрымкі гэта наогул было б немагчыма.

Мы яе адчувалі штодзённа: і тады, калі вы падказвалі злаба-дзённыя тэмы, калі пакідалі свае каментарыі на сайце газеты, калі галасавалі за нас рублём, і тады, калі “па поўнай” крытыкавалі нас. За гэта вам, шаноўныя чытачы, нізкі паклон і падзяка!

Прызнанне і падзяка за надзейнае супрацоўніцтва таксама нашым рэкламадаўцам, друкарам, распаўсюджвальнікам, нашым пазаштатнікам! Упэўнены, што такая сумесная праца як раз і дапамагае пісаць праўдзівы летапіс розных бакоў рэгіянальнага жыцця.

З гэтай упэўненасцю і з такім настроем на плённую супольную працу рэдакцыйны калектыў і падыходзіць да сустрэчы Новага 2013 года. Зычым і кожнаму з вас, каб надыходзячы год прыносіў толькі радасць, натхненне і задавальненне!

З навагоднімі віншаваннямі,
калектыў «Кур’ера»

Юныя чытачы “Кур’ера” адгукнуліся на рэдакцыйнае запрашэнне дасылаць лісты Дзеду Марозу не толькі актыўна, але і крэатыўна: Ліза Красоўская са Старых Дарог адрасавала навагодняму чарадзею разам з паштоўкай і зробленага сваімі рукамі прыгожага зайчыка, а случчанка Віялета Трызно –  цікавы варыянт святочнай елачкі. Цяжка ўтрымацца ад таго, каб не пракаментаваць, што менавіта такі падыход да справы дапамагае рабіць наша жыццё больш актыўным, цікавым і стваральным.