У Смаргоні акцыя памяці Лапіцкага — затрымалі жыхароў і мастакоў (абноўлена)

Мастакі прайшліся з карцінамі па вуліцах горада ў памяць пра героя антысавецкага падполля Расціслава Лапіцкага. Ноч яны правялі ў пастарунку. Сёньня, у панядзелак — суд.
Раніцай 2 верасня ў Смаргоні былі адзначаныя чарговыя ўгодкі з дня нараджэння кіраўніка Смаргонска-Вілейскага незалежніцкага падполля Расціслава Лапіцкага (1928–1950), расстралянага ў 1950 г.

Мастак са Смаргоні Валянцін Варанішча, юнак Уладзімір Шульжыцкі разам з сябрамі суполкі «Пагоня» Беларускага саюза мастакоў Генадзем Драздовым, Алесем Цыркуновым і Алесем Пушкіным наведалі праваслаўны храм, дзе былі асвячаныя чатыры намаляваныя Пушкіным партрэты Лапіцкага і быў замоўлены малебен у памяць аб бязвінна забітым юнаку.
Пасля з асвячанымі карцінамі яны прайшлі да помніка Францішку Багушэвічу у гарадскім парку, дзе выставілі карціны.
Акцыі выклікала нервознасць супрацоўнікаў Смаргонскага РАУС. Назіралі дзве асобы ў цывільным, потым падышлі два супрацоўнікі ў форме. Перамовіліся з удзельнікам, але акцыю не спынілі.
Удзельнікі жалобнай акцыі прастаялі там каля паўгадзіны і рушылі з карцінамі ў бок дома Валянціна Варанішчы, адначасова раздаючы буклеты аб Лапіцкім. Метраў праз 300 удзельнікаў затрымалі супрацоўнікі РАУС.
Цяпер затрыманыя знаходзяцца ў памяшканні Смаргонскага РАУС.
Таксама дзень народзінаў героя адзнчылі ў Польшчы

1 верасня ініцыятыва «Беларуская Нацыянальная Памяць» ушанавала памяць Расціслава Лапіцкага (1928 — 1950), лідара моладзевай арганізацыі ў паваеннай Беларусі.
У дзень яго нараджэння пад адкрытым небам быў арганізаваны прагляд фільма «Як пошуг маланкі», які распавядае пра жыццё Лапіцкага. Акрамя таго, удзельнікі сустрэчы запалілі знічы ў памяць пра яго каля помніка палякам, якія загінулі ў Варшаўскім паўстанні.
«Беларуская Нацыянальная Памяць» спадзяецца, што 1 верасня стане традыцыйным днём, калі беларусы будуць запальваць у гонар Расціслава Лапіцкага знічы, паходні і вогнішчы.
Таксама мерапрыемствы ў памяць аб Лапіцкім прайшлі ў Гданьску і Беластоку. У бліжэйшыя дні падобныя мерапрыемствы пройдуць у Беларусі.
Нагадаем, што ў 1948–1949 гадах у Смаргонскім і Мядзельскім раёнах з навучэнскай моладзі Расціслаў Лапіцкі стварыў антыкамуністычную падпольную арганізацыю, якая выдавала антысталінскія лістоўкі. Пасля раскрыцця арганізацыі яе сябры, у тым ліку і непаўналетнія, сталі вязнямі ГУЛАГу, а Расціслава Лапіцкага расстралялі. Падпісаць просьбу аб памілаванні ён адмовіўся.
http://nn.by/