Унікальная калекцыя слонімскага краязнаўца Міхаіла Рылко апынулася ў Нясвіжы. У Слоніме яна нікому не спатрэбілася

Унікальную калекцыю рэчаў з музея слонімскага краязнаўца Міхаіла Рылко “Беларускае мястэчка” цалкам купіў Нацыянальны гісторыка-культурны музей-запаведнік “Нясвіж”.

Больш за 600 прадметаў з прыватнай калекцыі слонімца Міхаіла Рылко ў хуткім часе стануць часткай новай экспазіцыі ў Нясвіжскай ратушы, сказаў карэспандэнту “ГС” дырэктар музея Сяргей Клімаў. А да 2015 года ў іх планах — адкрыццё Музея прыватных калекцый, куды ўвойдзе і збор нашага земляка.

Як адзначыў Сяргей Клімаў, усе рэчы з музея слонімца цікавыя. Бытавыя прадметы, мэбля маюць дачыненне да гарадской культуры канца XIX — пачатку XX стагоддзя і даюць уяўленне пра жыццё гараджаніна таго часу. Унікальную слонімскую калекцыю, як адзначыў Сяргей Клімаў, прапаноўвалі набыць многім музеям краіны.

Чаму ёй не зацікавіліся ў родным горадзе, карэспандэнт спытала ў дырэктара Слонімскага краязнаўчага музея імя І. Стаброўскага.

—Нам калекцыю ніхто не прапаноўваў. Мы спрабавалі неяк звязацца з роднымі Міхаіла Рылко, аднак гэта зрабіць не ўдалося. А так, вядома, па меры сваіх магчымасцей нешта хацелі б з калекцыі прыдбаць, — сказала дырэктар музея Наталля Рыжак.

Пры жыцці асветнік па духу Міхаіл Рылко хацеў, каб пад яго музей у Слоніме выдзелілі памяшканне, дзе можна было б прымаць экскурсіі, гасцей горада. А яшчэ ён марыў знайсці людзей, апантаных, як і ён, любоўю да Беларусі і яе мінулага.

У яго родным горадзе, як бачна, такіх не знайшлося.

Міхаіл Рылко нарадзіўся 9 траўня 1934 года ў г. Ганцавічы Брэсцкай вобласці ў сям’і рамесніка. Яго бацька быў гадзіннікавым майстрам, вучнем знакамітага Лявона Бурэ ў Маскве. Маці яго добра спявала і была спраўнай рукадзельніцай.

З 16 гадоў Міхаіл Рылко працаваў токарам. Пасля заканчэння ўніверсітэта займаўся журналістыкай, шмат друкаваўся. Свет убачылі яго кнігі “Чырвоны цягнік”, "Чайкоўскія”, "Слонім".

У 1997 годзе Міхаіл Іванавіч стварыў прыватны этнаграфічны музей-майстэрню “Беларускае мястэчка”. У доміку плошчай 100 м кв. на вуліцы К. Маркса размясцілася звыш 36 тысяч экспанатаў — больш, чым у раённым музеі.

У зборы меліся бытавыя прадметы з элементамі мастацкага афармлення, творы дэкаратыўна-прыкладнога мастацтва, калекцыі манет, медалёў, значкоў, біжутэрыі, малых скульптурных форм. Таксама была вялікая бібліятэка з архівам, калекцыямі літаграфій, баністыкі, экслібрысаў і інш.   

Памёр Міхаіл Рылко 5 студзеня 2012 года. Яго прах пахавалі ў Кракаве ў сямейным склепе.