Пікет у падтрымку слонімскага доктара забаранілі, бо ў гарадскім парку будзе крос

Згодна з рашэннем галоўнага ўрача Слонімскай ЦРБ Юрыя Пяцельскага, 27 чэрвеня доктара-траўматолага Івана Шэгу звольняць
з працы.

Івану Шэгу сёлета споўнілася 60 гадоў, 30 з якіх ён адпрацаваў у Слонімскай раённай бальніцы. У красавіку гэтага года галоўны ўрач бальніцы Юрый Пяцельскі даслаў Івану Шэгу ліст з паведамленнем, што кантракт з ім працягнуць яшчэ на адзін год: з 28 чэрвеня 2013 года да 27 чэрвеня 2014 года. Аднак прайшоў толькі месяц, і галоўны ўрач ЦРБ змяніў сваё рашэнне.
21 траўня Іван Шэга атрымаў ад Ю. Пяцельскага новае пісьмо, дзе галоўны ўрач папярэджвае: “Адміністрацыя Слонімскай ЦРБ паведамляе, што 27 чэрвеня 2013 г. Вы бу-дзеце звольнены ў сувязі з заканчэннем тэрміну кантракта, п. 2 ст. 35 Працоўнага кодэкса Рэспублікі Беларусь”.
Як толькі пацыенты доктара Івана Шэгі даведаліся пра тое, што яго збіраюцца звольніць, то адразу пачалі збіраць подпісы пад зваротам у розныя інстанцыі. Людзі про-
сяць даць ім магчымасць лячыцца ў вопытнага доктара, якому яны давяраюць і якога ведаюць шмат гадоў. На сёння ў падтрымку доктара сабрана каля 1200 подпісаў.
Акрамя гэтага, 27 чэрвеня ў падтрымку доктара Івана Шэгі слонімцы планавалі правесці ў гарадскім парку пікет. З гэтай мэтай у мясцовы райвыканкам падалі заяўку на атрыманне дазволу.
Аднак мясцовыя ўлады не дазволілі правесці гэтае мерапрыемства. Адмовілі на падставе таго, што ў гэты дзень і час, згодна з планам работы аддзела па справах моладзі і ГА “БРСМ”, у гарадскім парку быццам бы будуць праходзіць крос-віктарыны “Ведай свой край”. Таму ў сувязі з гэтым мясцовыя ўлады не могуць прадставіць арганізатарам пікету месца ў гарадскім парку.
Арганізатары пікету вельмі здзівіліся, калі атрымалі такі адказ. Бо гарадскі парк — гэта адзінае месца, вызначанае мясцовымі ўладамі, дзе можна праводзіць масавыя мерапрыемствы. Таксама не зразумела, якім чынам пікет мог бы перашкодзіць правядзенню крос-віктарынаў?