Аляксей Якімовіч: “Я задаволены і рады, што дзеці і іх бацькі чытаюць на беларускай мове”

Нядаўна ў выдавецтве “Народная асвета” ў Мінску выйшла з друку кніга для малодшых школьнікаў, настаўнікаў і бацькоў “Казкі-падказкі” тыражом 3000 асобнікаў. Вялікі наклад па сённяшнім часе.

Аўтар “Казак-падказак”, пісьменнік са Слоніма Аляксей Якімовіч, сцвярджае, што жанр навукова-мастацкай казкі — гэта яго вынаходніцтва.

—Мастацка-навуковыя казкі — новы жанр. Раней у Беларусі і, наколькі мне вядома, у Расіі ніхто не выдаваў такія казкі асобнай кніжкай. Казкі тут нагадваюць загадкі, — адзначыў пісьменнік у размове з карэспандэнтам “ГС”.

—   А ў чым яшчэ асаблівасць, адметнасць навукова-мастацкай казкі як жанру дзіцячай літаратуры?

—   Гэты жанр цікавы для дзяцей тым, што ён займальны, падобны на гульню. З дапамогай такіх казак можна вывучыць многія правілы беларускай граматыкі, навучыцца добра чытаць і пісаць.

—   Вы ўжо шмат выдалі кніжак для дзяцей у апошнія гады. Шмат якія Вашы творы друкуюцца ў нашай газеце на дзіцячай старонцы “Праменьчык”. Скажыце, ці мае сёння попыт дзіцячая кніжка?

—   Пачынаючы з 2008 года ў выдавецтве “Народная асвета” выйшлі восем маіх кніг і адну перавыдалі. Усе гэтыя выданні арыентаваны на дзяцей, іх бацькоў і настаўнікаў. Хацелася б тут падзякаваць дырэктару і супрацоўнікам выдавецтва “Народная асвета” за такую ўвагу да маёй творчасці і спрыянне ў распаўсюджванні дзіцячай літаратуры. Акрамя “Народнай асветы”, за гэты час выйшлі яшчэ дзве мае кніжкі ў выдавецтвах “Беларусь” і “Адукацыя і выхаванне”. Як бачыце, кніжкі выдаюцца, а значыць, маюць попыт.

—   Вы можаце гэтым сёння ганарыцца?

—   Пра тое, што мае кніжкі карыстаюцца попытам у чытача, неаднойчы сведчылі спецыялісты з аддзелаў маркетынгу выдавецтваў. Дый тыражы пра гэта кажуць. Я задаволены найперш тым, што дзеці і іх бацькі чытаюць на беларускай мове, што беларускае слова ім падабаецца.

—   Давайце вернемся да “Казак-падказак”. Як будзе распаўсюджвацца Ваша апошняя кніга?

—   Як і іншыя мае кніжкі, “Казкі-падказкі” будуць прадавацца ў крамах і распаўсюджвацца праз бібліятэкі.

—   Гэты год для Вас плённы і завяршаецца выхадам новай кнігі. А якія  творчыя планы ў пісьменніка Аляксея Якімовіча на наступны год?

—   Творчых планаў шмат. Некаторыя задумы збываюцца, некаторыя — не. Таму наперад казаць пра іх не хачу.