Слонімскія чыноўнікі заблыталіся

На днях слонімскі грамадскі актывіст Іван Бядко атрымаў са Слонімскага райвыканкама адказ на калектыўную скаргу, які яго моцна здзівіў.

Справа ў тым, што жыхары вуліцы 1-й Сямігодкі, што ў мікрараёне Альбярцін, звярталіся ў Слонімскі райвыканкам з пісьмовай скаргай, у якой прасілі правесці добраўпарадкаванне іхняй вуліцы. Прасілі адрамантаваць дарогі, зрабіць дзіцячую пляцоўку і іншае.
З пісьмовага адказу, атрыманага са Слонімскага райвыканкама ад 27.11.12 за № 02-03/кол-403, Іван Бядко даведаўся, што нібыта работы па добраўпарадкаванні вуліцы ўжо завершаны. У прыватнасці, там напісана: «Слонимский районный исполнительный комитет информирует, что работы по благоустройству улицы 1-й Семилетки в рамках производства работ по объекту «Реконструкция благоустройства дворовых территорий квартала многоквартирной жилой застройки по
ул. 1-й Семилетки» в г. Слониме (1 очередь)» завершены.
Принятое по Вашему обращению решение может быть обжаловано в Гродненский областной исполнительный комитет”.
— Справа ў тым, што ніякіх рамонтных работ на вуліцы
1-й Сямігодкі не праводзілася, і ўсё застаецца, як і было. Праблема не вырашана. А вось на Калгаснай вуліцы, якая мяжуе з нашай, рамонтныя работы сапраўды вяліся. Але ж не на нашай вуліцы, — патлумачыў карэспандэнту “ГС” Іван Бядко.
 — Каб пазнаёміць з гэтым адказам жыхароў нашай вуліцы, якія ставілі свае подпісы пад зваротам да ўладаў, я яго памножыў і копіі развесіў на пад’ездах жыхароў нашай вуліцы. Аднак у панядзелак, 3 снежня, да мяне дахаты прыйшлі чатыры чалавекі. Сярод іх была начальнік аддзела жыллёва-камунальнай гаспадаркі Слонімскага райвыканкама Тамара Ямеліна, участковы міліцыянер і работнікі ЖКГ. Тамара Ямеліна пачала казаць мне, што нібыта я не меў права развешваць гэтую інфармацыю, якую яны чамусьці называлі лістоўкай. Міліцыянер хацеў скласці нейкі пратакол-апытанне, але я сказаў, што падпісваць нічога не буду і не лічу сябе ў чымсьці вінаватым. На гэта мне сказалі, што пазней ўсё роўна на мяне складуць пратакол. На тым наша размова закончылася. Што будзе далей — пабачым, — адзначыў Іван Сямёнавіч.