А хіба такія зарплаты ёсць?

Слонімцам прапануюць вакансіі з заробкам меншым, чым пенсія

У мінулым нумары «ГС» шукала слонімцаў, чыя зарплата меншая за пенсію, што атрымлівае сярэднестатыстычны слонімскі пенсіянер — 1 956 153 рублі.

На прызыў карэспандэнта адклікнуўся мужчына, які сам, дарэчы, з’яўляецца пенсіянерам.

—Схадзіце ў адукацыю ці культуру і паглядзіце, колькі там атрымлівае тэхнічны персанал, — прапанаваў слонімец, які патэлефанаваў на рэдакцыйны нумар і назваўся Віктарам. — Сам там працаваў, бо на пенсію цяжка пражыць, і таму ведаю.

Заробак рабочага па комплексным абслугоўванні будынкаў, па словах слонімца, складае ад 1 100 000 да 1 400 000 рублёў.

—Сказаў дачцэ, якую зарплату плацяць, дык яна здзівілася, што такія зарплаты яшчэ ёсць. А я абслугоўваў два будынкі, усю працу выконваў, а дырэктар да таго ж загадала прыбіраць тэрыторыю, гэта значыць, ускласці на сябе абавязкі дворніка. І ўсё гэта за грашы, а не за грошы — шукаюць на дурніцу пенсіянераў, бо нармальны мужчына не пойдзе сёння на такую працу.

Пенсіі сёння, як рэзюмаваў субяседнік, сапраўды іншы раз большыя за заробкі тых, хто працуе.

Каму ў Слоніме прапануюць зарплату меншую за сярэднюю пенсію, паспрабавала высветліць карэспандэнт.
Згодна са спісам вакансій на 21 лістапада, мінімальны заробак у Слоніме прапануюць качагару — 1 млн. 065 тыс. Прадаўцу з вопытам працы і адпаведнай адукацыяй некаторыя наймальнікі гатовы плаціць 1,1 млн., повару без шкодных звычак — 1,5 млн.

Праца памочніка выхавальніка ў дзіцячым садку ацэньваецца ў 1,2 млн., самога выхавальніка — у 1,7 млн. Сакратар у вясковай школе заробіць 1 млн. 300 тысяч, і, як сказаў карэспандэнту дырэктар гэтай школы па тэлефоне, разлічваць у дзяржаўнай установе на намнога большую суму не прыходзіцца нават пры значным асабістым укладзе работніка і яго стараннасці.

Тэрмінова ў Слоніме патрабуюцца паштальёны за 1,5 млн. Машыніст сцэны ўладкуецца ў тэатр з заробкам 1,6 млн. рублёў. Токару з вопытам працы і электрагазазваршчыку, а таксама заатэхніку дадуць месячнае ўзнагароджанне памерам 1,6-1,8 млн. руб. Вадзіцеляў катэгорыі «В», «С», «Е» запрашаюць на працу за 1,7 млн. Столькі каштуе і праца інжынера-праграміста ў школе.

Найбольш распаўсюджаны заробак, які прапануюць сёння слонімскія работадаўцы, — 2  мільёны рублёў. Такіх двухмільённых вакансій карэспандэнт у спісе налічыла каля ста. Гэта не намнога перавышае памер сярэдняй пенсіі.

Слонімцаў, чые даходы ў некалькі разоў большыя за прыведзеныя лічбы, такія заробкі рассмешаць. Толькі вось качагару ці памочніцы дзіцячага садка, як і многім іншым, будзе не да смеху.