Слонімец удзельнічаў у віленскай канферэнцыі

У мінулыя выходныя, з 16 па 18 лістапада, у Вільні прайшла міжнародная канферэнцыя "Праграма трансфармацый для дэмакратычнай Беларусі". У канферэнцыі прыняў удзел прадстаўнік са Слоніма, член Партыі БНФ Віктар Марчык, які падзяліўся сваімі ўражаннямі ад удзелу ў канферэнцыі.

— У канферэнцыі ўдзельнічалі палітычныя дзеячы Літвы і прадстаўнікі шэрагу палітычных партый Беларусі. З Літоўскага боку на канферэнцыі выступілі прэм’ер-міністр Літвы Андрус Кубілюс, які расказаў пра сучасны стан літоўскай эканомікі і плануемых рэформах, накіраваных на паляпшэнне эканамічнага становішча.

Дацэнт Віленскага ўніверсітэта Тэадорас Медайскіс расказаў пра вопыт стварэння сістэмы сацыяльнай абароны і пенсійнай сістэмы Літвы. З вуснаў літоўскіх палітыкаў прагучала інфармацыя аб тым, што дэпутаты літоўскага Сейму ў межах правядзення сацыяльна-эканамічных рэформ, прынялі рашэнне знізіць свае заробкі на 40%.

Са свайго боку беларускія эксперты далі ацэнку сённяшняй сітуацыі на Беларусі і прадставілі сваё бачанне будучага працэсу трансфармацыі ў краіне. Сярод беларускіх выступоўцаў былі доктар эканамічных навук, прафесар, экс-галава нацыянальнага банку Беларусі Станіслаў Багданкевіч, які расказаў пра сістэму сацыяльнага забеспячэння ў Беларусі і прыняцці неабходных мераў па яе мадэрнізацыі.

Палітолаг Валерый Карбалевіч расказаў пра тое, чаму не ўдалася беларуская трансфармацыя і пра яе далейшыя перспектывы. Старшыня асветніцкага грамадскага аб’яднання "Фонд імя Льва Сапегі” Міраслаў Кобаса распавёў пра праблемы і перспектывы мясцовага самакіравання ў Беларусі.

Наогул, канферэнцыя прайшла цікава і плённа, адбыўся абмен вопытам і думкамі, — зазначыў Віктар Марчык.