Суд не задаволіў скаргу Івана Шэгі да райвыканкама

19 студзеня слонімскі грамадскі актывіст Іван Шэга спрабаваў аспрэчыць у судзе адмову Слонімскага райвыканкама ў правядзенні пікетаў у падтрымку лідара незарэгістраванай праваабарончай арганізацыі “Вясна” Алеся Бяляцкага, які цяпер знаходзіцца за кратамі.

У верасні, кастрычніку і лістападзе 2011 года Іван Шэга звяртаўся ў райвыканкам з заявамі аб правядзенні ў Слоніме пікетаў з мэтай інфармавання жыхароў Слоніма аб дзейнасці праваабарончай арганізацыі “Вясна” і яе лідара Алеся Бяляцкага, але райвыканкам тройчы адмаўляў яму пад рознымі падставамі.

Асабліва не абгрунтавана гучала адмова правесці пікет 3 снежня ў гарадскім парку. Тады ў адмове тлумачылася, што месца правядзення пікета не адпавядае рашэнню райвыканкама №152 ад 24.04. 2002 г. аб зацвярджэнні месцаў для правядзення масавых мерапрыемстваў. У тым даўнім рашэнні гарадскі парк сапраўды не значыўся месцам правядзення масавых мерапрыемстваў (хаця, натуральна, яны там праводзіліся ўладамі), але ў верасні 2011 года райвыканкам прыняў другое рашэнне, дзе гарадскі парк якраз названы такім месцам. Тым не менш правесці ў парку пікет на пачатку снежня Івану Шэгу адмовілі якраз з такой дзіўнай фармулёўкай.
“Прашу суд прызнаць рашэнне Слонімскага раённага выканаўчага камітэта ад 25.11.2011 года №02-03/ш-1174 незаконным і абмяжоўваючым мае грамадзянскія правы”, — напісаў у сваёй скарзе ў суд Іван Шэга.
Але і спроба праз суд прызнаць тую адмову неабгрунтаванай поспеху не мела. 
Варта ўзгадаць, што, калі раённы суд у Слоніме не задаволіў скаргу Івана Шэгі, у Мінску жонка палітвязня Алеся Бяляцкага Наталля Пінчук пералічыла на рахунак суда Першамайскага раёна грошы, сабраныя беларускімі грамадзянамі ў падтрымку Алеся Бяляцкага. Паводле “Радыё Рацыя”, 757 мільёнаў рублёў пераведзены ў якасці выплаты шкоды, якую нібыта нанёс дзяржаве Алесь Бяляцкі. 
Нагадаем, што 4 лістапада 2011 года судом Першамайскага раёна Мінска кіраўнік Праваабарончага цэнтра “Вясна” і віцэ-прэзідэнт Міжнароднай федэрацыі за правы чалавека Алесь Бяляцкі прысуджаны да чатырох з паловай гадоў пазбаўлення волі ва ўмовах узмоцненага рэжыму з канфіскацыяй маёмасці. 24 студзеня чакаўся разгляд касацыйнай скаргі на гэты прысуд.