Нялёгкая вахта міласэрнасці і дабрыні

На ўрачыстасць, прысвечаную 25-годдзю стварэння аддзялення сацыяльнай дапамогі на даму, з’ехаліся сацыяльныя работнікі нават з самых аддаленых населеных пунктаў Шчучыншчыны. Менавіта тым, хто нясе святло і цяпло ў многія дамы, былі адрасаваны ў той дзень асобыя, самыя шчырыя словы ўдзячнасці.

Віншаванні чаргаваліся з музычнымі нумарамі, якія падрыхтавалі для ўдзельнікаў урачыстасці самадзейныя артысты Астрынскага Дома культуры і тэатральнай творчасці. Самаадданая праца сацыяльных работнікаў была ацэнена па заслугах: ганаровыя граматы, пісьмы-падзякі, грашовыя падарункі – многія атрымалі ўзнагароды. Не засталіся без увагі і ветэраны службы.

– За чвэрць стагоддзя служба сацыяльнага абслугоўвання на даму набіралася вопыту, расшыралася, – звярнулася да калег і гасцей урачыстасці дырэктар тэрытарыяльнага цэнтра сацыяльнага абслугоўвання насельніцтва Святлана Уладзіміраўна Шанчук. – Некалькі год таму ў цэнтры было толькі тры аддзяленні, цяпер мы адкрываем шостае. Усё гэта стала магчымым дзякуючы сацыяльнай арыентаванасці нашай дзяржавы і, безумоўна, спецыялістам і сацыяльным работнікам, якія знаходзяцца на перадавой – робяць усё магчымае, каб розныя катэгорыі грамадзян не адчувалі сябе пакінутымі.

Са святам павіншавала віноўнікаў урачыстасці і намеснік старшыні райвыканкама Ганна Станіславаўна Хвядзюк.

– Час станаўлення службы абслугоўвання на даму прайшоў, – адзначыла Ганна Станіславаўна. – Цяпер неабходна актыўна дзейнічаць. Любая ўлада можа адчуваць сябе жыццяздольнай, калі кожны член грамадства выконвае свае задачы. А работнікі сацыяльнай службы са сваімі абавязкамі спраўляюцца дастойна.

Ганна Станіславаўна падзякавала работнікам за іх працу, цярпенне і высакародства.

Вельмі сімвалічнымі палічыў начальнік упраўлення па працы, занятасці і сацыяльнай абароне насельніцтва Міхаіл Міхайлавіч Куц словы з песні “Домік вокнамі ў сад”, якія прагучалі на ўрачыстасці.

– Так і нашы бабулькі, седзячы ў акенцах, чакаюць сацыяльных работнікаў, – сказаў Міхаіл Міхайлавіч. – Людзям патрэбна наша дапамога. І мы павінны працаваць так, каб не падмануць іх чаканняў.
Ганна РУДСКАЯ.