У Дэмбраве вадзіца – быццам з крыніцы

– У нашых мясцінах вада настолькі чыстая, што магла б выкарыстоўвацца для вытворчасці розных напіткаў, – расказвае старшыня Дэмбраўскага сельвыканкама Віталій Часлававіч Радзімінскі. – Спецыялісты, што бралі аналіз вады, прыйшлі да такой высновы. І нават без ачышчэння на станцыі абезжалезвання яна ўтрымлівае вельмі мала жалеза.

Вада чыстая, смачная, але некаторы час таму дэмбраўцы, напэўна, згадзіліся б і на горшую, толькі б яна прыходзіла да іх у дамы. Дрэннае паступленне вады стала для жыхароў аграгарадка сапраўднай праблемай, для вырашэння якой былі патрэбны вялікія сродкі.

– У Дэмбраве яшчэ ў 70-ыя гады былі прабураны дзве свідравіны, праз якія да нядаўняга часу паступала вада, – уводзіць нас у курс спраў майстар РУП ЖКГ Анатолій Уладзіміравіч Драбышэўскі. – Паколькі тэрміны іх эксплуатацыі даўным-даўно выйшлі – такія свідравіны могуць выкарыстоўвацца гадоў дваццаць пяць і не болей – вада праходзіла вельмі цяжка.
Нават, каб уключыць пральную машынку-аўтамат, многія гаспадыні ўставалі ў тры гадзіны ночы – тады расход вады ў аграгарадку быў меншым, і была верагоднасць, што машынка паспее да раніцы завяршыць аперацыі. Вады не хапала. Выйсце існавала толькі адно – бурыць новую свідравіну. І такое рашэнне было прынята.

– За два тыдні ўправіліся спецыялісты “Гроднааблводаканала”, – працягвае Анатолій Уладзіміравіч. – Працавалі, што называецца, на сумленне – вахтавым метадам і без выхадных. Цяпер вады хапае ўсім: і арганізацыям, і індывідуальным карыстальнікам. Глыбіня новай свідравіны – 48 метраў. Менавіта на такой адлегласці ад паверхні зямлі спецыялісты дабраліся да воднага пласта.

Жыхары Дэмбрава, а вадой карыстаюцца 529 чалавек, за месяц расходуюць каля 2000 м3 вады. Акрамя гэтага, вада патрэбна школе, дзіцячаму садку, бальніцы, у адміністрацыйныя будынкі. Да вялікай радасці дэмбраўцаў, цяпер вады хопіць ўсім! Пабудаваная па самых сучасных тэхналогіях, свідравіна поўнасцю зможа забяспечыць патрэбы спажыўцоў.

– Усё абсталяванне новае, сучаснае, – радуецца Анатолій Уладзіміравіч. – Помпа, трубы, 15-метровы фільтр… Вада са свідравіны адразу падаецца на станцыю абезжалезвання, затым – на воданапорную вежу і ў дамы грамадзян. Але на ўсялякі выпадак мы захаваем і дзве былыя свідравіны.

– Нядаўна ў Дэмбраве будаўнікі здалі ў эксплуатацыю пяць новых домікаў, – дадае Віталій Часлававіч Радзімінскі. – А гэта – спажыўцы, якім таксама патрэбна вада. Плануецца, што сёлета яшчэ пяць сямей атрымаюць новае жыллё. Так што прабураная свідравіна нашаму аграгарадку вельмі і вельмі дарэчы.
Ганна РУДСКАЯ.
Фота аўтара.