У спажыўкааперацыі ёсць пэўныя абавязацельствы перад насельніцтвам

Нядаўна адбылася “прамая лінія” са старшынёй праўлення раённага спажывецкага таварыства Аляксеем Валянцінавічам Садоўскім. Гадзіна, адведзеная на дыялог кіраўніка з жыхарамі раёна, праляцела імгненна: тэлефанаванні “ішлі” адно за адным, тычыліся самых розных тэм. На большасць пытанняў адказы прагучалі адразу, на асобныя яны будуць дадзены з цягам часу – пасля дэталёвага высвятлення сітуацыі.

Магазіну №7 на вуліцы Акадэмічнай у Шчучыне ой як патрэбен рамонт. Ці плануеце яго? Хацелася б, каб і асартымент тавараў быў тут крыху большы...
– Рамонт гэтага магазіна ў нашых планах ёсць. Мяркуем зрабіць яго напрыканцы года, а таксама замяніць гандлёвае абсталяванне. Ажыццяўленне задум будзе залежаць ад фінансаў. Калі гэта ўдасца, пашырым і асартымент. І ўсё ж Вы павінны зразумець, што асартымент у пэўнай меры залежыць ад пакупніцкай здольнасці. Запоўніць паліцы невялікага магазіна нескладана, але праз некалькі дзён узнікне пытанне з рэалізацыяй, да прыкладу, той жа каўбасы ці сыроў... Лічу, разумны набор прадуктаў тут павінен быць заўжды, а шырокі іх выбар прапануе той жа універсам “Цэнтральны”, да якога недалёка.

У суботу гэта было. Купіла ў магазіне капусту і ... забылася забраць. Вярнулася назад недзе праз гадзіну. Узаемаразумення з прадаўцом не знайшла. Да таго ж яна адмовілася даць кнігу заўваг і прапаноў...
– У гэтай сітуацыі абавязкова разбярэмся. Дзеянням прадаўца дадзім ацэнку. А вось адмова даць кнігу заўваг і прапаноў, скажу адразу, – сур’ёзнае парушэнне, за якое прадугледжана адказнасць. А Вы абавязкова атрымаеце адказ.

З вёскі Касцянева турбуюць. Ці можна здаць вашым нарыхтоўшчыкам тлушч свіны – маю два вядры – і фасолю белую? Мо патрэбны гэтыя прадукты для сталовых?
– Тлушч і фасолю ў насельніцтва мы не закупляем. Той шырокай сеткі сталовых, што некалі была ў раёне, ужо няма. Да таго ж, каб прыняць такі спецыфічны прадукт, як тлушч, патрэбны рознага роду даведкі і ветпасведчанні. Спажывецкая кааперацыя закупляе сёння толькі тое, што потым прадае праз магазіны ці адпраўляе перапрацоўчым прадпрыемствам.

У Астрыне патрэбен шклопрыёмны пункт...
– Прыём шклатары ў вашым пасёлку ажыццяўляе магазін “Дзяжурны”.
Каментарый наўздагон
– Наш намер адкрыць шклопрыёмны пункт “разбіўся” аб кадравае пытанне – жадаючага працаваць у ім так і не знайшлося. Паміж іншым, ёсць пытанні па прыёме шклатары і ў іншых населеных пунктах раёна. Сітуацыю гэту мы сёння абмеркавалі. Паспрабуем вырашыць яе такім чынам: раз на месяц будзем адпраўляць у вёскі машыну, каб людзі маглі здаць шклапосуд.

З Турэйска турбуюць. Чаму ў аўтамагазіне, які прыязджае ў нашу вёску, цэны на некаторыя тавары розняцца ад тых, што ў гарадскіх магазінах?
– Абавязкова праверым гэты факт. Як вы разумееце, цяпер не навіна, што кошты аднаго і таго ж тавару ў розных гандлёвых кропках могуць адрознівацца, у прыватнасці, з-за розніцы ў гандлёвай нацэнцы. Галоўнае, каб лічбы на цэнніку не былі вынікам наўмысных незаконных дзеянняў прадаўца. Вось гэта ўжо парушэнне, за што прадугледжана адказнасць.

У астрынскіх прадуктовых магазінах у апошні час няма ў продажы каўбасы з мяса птушкі. Чаму?
– Прыкладна з тыдзень, як на Скідзельскай птушкафабрыцы нам адмовілі ў пастаўцы гэтай прадукцыі. Спасылаюцца на яе недахоп. Што будзе далей – пакуль не скажу. Дарэчы, прадукцыя з мяса птушкі карыстаецца попытам: яна і танная, і смачная, і рэалізуецца хутка. Спажыўкааперацыя зацікаўлена ёю гандляваць, але часовыя перабоі з пастаўкай парушылі нашы агульныя планы. Абяцаю, што як толькі атрымаем першую партыю курыных далікатэсаў, у першую чаргу адправім астрынскім пакупнікам.

Сабралі два вядры вішань. Вашы нарыхтоўшчыкі абяцалі, што забяруць...
– Раз абяцалі – прыедуць і забяруць.

Ці будзеце закупляць маліну і журавіны?
– На маліну няма попыту з перапрацоўчых прадпрыемстваў. Ягада гэта спецыфічная, хутка страчвае таварны выгляд. Закупіць яе ў насельніцтва, каб ляжала і псавалася, – недапушчальна. А заводы, як я ўжо сказаў, працаваць з малінай не хочуць. Што датычыць журавін – прымаць будзем. Цэны на іх сплануе рынак. Устанаўліваюцца яны з улікам таго, што даюць нарыхтоўшчыкі-канкурэнты, і прадпрыемствы-вытворцы.
Каментарый наўздагон
Як патлумачыў А.В. Садоўскі, у райспажыўтаварыстве ўжо сёння абмеркавалі, як правядуць закуп яблыкаў у насельніцтва. Будуць складзены графікі і праз магазіны даведзены да ведама жыхароў. У вызначаны дзень у канкрэтны населены пункт прыедзе аўтамабіль нарыхтоўшчыкаў.
Як падкрэсліў Аляксей Валянцінавіч, у спажыўкааперацыі ёсць пэўныя абавязацельствы перад насельніцтвам, так бы мовіць, яна працуе з пазіцый дзяржаўнага падыходу да вырашэння пытанняў і праблем людзей. А тыя ж нарыхтоўшчыкі-прыватнікі цікавяцца найперш сферамі, што даюць прыбытак. Устанавілі вытворцы добрую цану на чарніцы ды лісічкі – будуць іх актыўна закупляць. А па вядро вішні ў вёску нізавошта не паедуць... Так і з гандлёвай дзейнасцю: што выгадна – павязуць вяскоўцу. У дзень зарплаты ці выплаты пенсіі – таксама ля патэнцыяльных пакупнікоў... А ў асеннюю непагадзь ці зімовую сцюжу могуць і не паехаць.

Ці будзе працаваць магазін у Замасцянах?
– У магазіне правядзём невялікі рамонт, пакуль што ён будзе працаваць. Работу гэтай гандлёвай кропкі мы нядаўна абмяркоўвалі з намеснікам старшыні райвыканкама М.І. Міхно.

Не за гарамі верасень. Ці будзе магчымасць набыць школьную форму ў магазінах спажыўкааперацыі?
– Мы будзем старацца задаволіць попыт нашых пакупнікоў. Паколькі на рынках цяпер цэны кусаюцца, мяркуем, што бацькі школьнікаў прыйдуць па абноўкі менавіта да нас. Разам з тым, вымушаны прызнаць, што на сённяшні дзень фабрыкі-вытворцы не выконваюць нашы прамыя заяўкі на школьную форму, пададзеныя яшчэ ў чэрвені. “Калінка” прапанавала толькі рэшткі прадукцыі мінулагодняга сезона, а навагрудская фабрыка ўвогуле адмовіла... Да таго ж патрабуюць папярэднюю аплату за тавар. Выправіць сітуацыю спрабуем праз супрацоўніцтва з гродзенскай базай “Гандальадзенне”. Зрэшты, час яшчэ ёсць, спадзяюся, вытворцы сваю “палітыку” зменяць.

У продажы няма цэменту. У чым прычына?
– Летам актыўна вядзецца будаўніцтва, таму вялізны попыт на цэмент. На ліпень фонды на гэты тавар нам павялічылі, гэта 120 тон. Усё, што атрымаем, пойдзе ў продаж. Іншая справа, што цэмент раскупляюць як гарачыя піражкі. Да прыкладу, у пятніцу адправілі ў гандаль 15 тон, а за выхадныя ўсё раскупілі...
“Прамую лінію” падрыхтавала
Таццяна ПАЛУБЯТКА.