“Алімп” прымае гасцей

У мінулую нядзелю на стадыёне “Алімп” прайшлі трэція гарадскія гульні працоўных, прысвечаныя Дню вызвалення Шчучыншчыны ад нямецка-фашысцкіх захопнікаў. У спартыўным мерапрыемстве прынялі ўдзел пятнаццаць каманд.

Прысутных вітаў старшыня раённага Савета дэпутатаў Іван Юльянавіч Сакалоўскі. Ён адзначыў рост колькасці ўдзельнікаў спартакіяды і пажадаў спартсменам здароўя і поспехаў.

І вось пачаліся спаборніцтвы. Армрэслінг, падняцце гіры, падцягванне на перакладзіне, стральба з пнеўматычнай вінтоўкі, дартс, лёгкаатлетычная эстафета, перацягванне каната... Конкурсы патрабавалі ад спартсменаў высокай фізічнай падрыхтоўкі і поўнай самааддачы.

З асаблівым напалам сапернічалі спартыўныя сем’і. Бацькі разам са сваімі дзеткамі ўдзельнічалі ў лёгкаатлетычнай эстафеце, дэманстравалі свае здольнасці ў гімнастыцы, дартсе і баскетбольных кідках.

– Наша сям’я ўдзельнічае у спартакіядзе ўпершыню, – дзеліцца стораж камбіната бытавога абслугоўвання Іван Іванавіч Крываногаў. – Майму сыну Даніілу сёлета споўнілася дзесяць гадоў. Ён захапляецца футболам і гандболам, плануе наведваць спартыўныя секцыі... Бацькі павінны паказваць прыклад сваім дзецям. Мы – за здаровы лад жыцця, таму з задавальненнем падтрымалі спартыўную ініцыятыву. Прызнацца, былі вельмі ўражаны атмасферай добразычлівасці і ўзаемадапамогі, якая валадарыць на спаборніцтвах.

– Тата прапанаваў мне паўдзельнічаць у конкурсе спартыўных сем’яў, і я адразу згадзіўся, – прызнаецца Данііл Крываногаў. – Спартакіяда – выдатная магчымасць сустрэцца з сябрамі і цікава адпачыць.

– Стала добрай традыцыяй праводзіць круглагадовыя гарадскія гульні працоўных, – гаворыць начальнік аддзела фізічнай культуры, спорту і турызму Іван Вікенцьевіч Гваздоўскі. – З пачатку года праходзілі спаборніцтвы па валейболе, стрытболе, настольным тэнісе, плаванні, шашках... На жаль, не ўсе арганізацыі падтрымалі нашу ініцыятыву. З дзевятнаццаці запрошаных каманд у спартакіядзе прынялі ўдзел толькі пятнаццаць. Хочацца засяродзіць увагу кіраўнікоў арганізацый: неабходна папулярызаваць спорт сярод працоўных і набыць камандам неабходны спартыўны інвентар.

Высокі ўзровень падрыхтоўкі паказалі каманды МПМК-166, РЭСа, аўтапарка №12, камбіната бытавога абслугоўвання, ЖЭСа, Шчучынскай ЦРБ… Ва ўпартай барацьбе вызначыліся лідары. Пераможцамі трэціх гарадскіх гульняў працоўных другі год запар сталі спартсмены МПМК-167, другое і трэцяе месцы адпаведна занялі каманды завода “Аўтапровад” і РУП ЖКГ. Прызёры былі ўзнагароджаны ганаровымі граматамі і кубкамі.
Аляксандр КАСПЯРЧУК.
Фота аўтара.