Грэчка – проста на выдатна!

Прычым зрабіць гэта надарылася ў самым што ні ёсць прамым сэнсе: кожнаму з прысутных былі раздадзены ацэначныя табліцы, з дапамогай якіх удзельнікі маглі паставіць той бал, якога заслугоўваў даны палетак. Пры падліку “галасоў” у гэтым дэмакратычным “галасаванні” былі вызначаны гаспадаркі-лідары. Першае месца па ўзроўні культуры земляробства належыць ААТ “Васілішкі”, другое – СВК “Дэмбрава”, а трэцяе замацавалася за “Шчучынаграпрадуктам”.

– Падчас агляду пасеваў былі адзначаны як станоўчыя, так і адмоўныя моманты ў земляробстве, – падкрэслівае першы намеснік начальніка ўпраўлення сельскай гаспадаркі і харчавання Ю.Г.Бяляўскі. – Да прыкладу, пасевы яравых, што называецца, выпалены – пацярпелі ад засухі ў пачатку лета, а вось грэчка літаральна ва ўсіх гаспадарках вельмі парадавала. Гэта запатрабаваная зараз культура ў раёне вырошчваецца на 530 гектарах: хопіць, каб і дзяржаўны заказ выканаць, і сабе на насенне пакінуць.

Юрый Генрыкавіч адзначыў добры стан бульбяных палеткаў, пасеваў цукровых буракоў і кукурузы. Нашмат аптымістычней, чым летась, выглядае азімы рапс. А вось тое, што ў большасці гаспадарак (акрамя саўгаса “Вялікае Мажэйкава”) адсутнічаюць якасныя сумесі аднагадовых культур, якія па сутнасці з’яўляюцца падмуркам для кармавой базы, – гэта ў спецыялістаў выклікае трывогу.

У аглядзе пасеваў прыняў удзел начальнік упраўлення сельскай гаспадаркі і харчавання С.І. Матуйза.

...Усе сельгасгаспадаркі раёна ў прадчуванні хуткага жніва: заканчваецца падрыхтоўка зернеўборачных камбайнаў. Частка іх ужо апрабавана ў дзеянні: тэхніка была паспяхова задзейнічана на ўборцы азімай свірэпіцы. Гэта культура ўбрана на плошчы 63 га. Намалочана 109 тон насення, якое выкарыстоўваецца для вытворчасці тэхнічнага масла. Ураджай свірэпіцы ўпаўне прыстойны – 17,7 цэнтнера з гектара, што, дарэчы, вышэй, чым у многіх раёнах вобласці.

Вось-вось будзе дадзены старт самай гарачай і адказнай сельскагаспадарчай кампаніі года: камбайнеры выйдуць на ўборку азімага ячменю.
Таццяна ВАЛЯНЦІНАВА.