Калі дзяцей абараняюць ад бацькоў…

45 дзяцей раёна на сённяшні дзень прызнаны маючымі патрэбу ў дзяржаўнай абароне, з іх 4 – ва ўзросце да 3-х гадоў. Гэтыя дзеці не толькі былі пазбаўлены бацькоўскага цяпла і клопату. На жаль, дрэнная спадчыннасць і ўмовы жыцця наклалі свой адбітак і на здароўе хлопчыкаў і дзяўчынак. Комплекснае медыцынскае абследаванне паказала, што абсалютна здаровых дзяцей, г.зн. з І групай здароўя, сярод іх няма. Няма абсалютна здаровых дзяцей і сярод тых, хто знаходзіцца ў сацыяльна небяспечным становішчы.

Справаздача аб выніках комплекснага медыцынскага абследавання дзяцей, прызнаных, што яны знаходзяцца ў сацыяльна небяспечным становішчы і маюць патрэбу ў дзяржаўнай абароне, была заслухана на чарговым пасяджэнні каардынацыйнага савета па выкананні Дэкрэта Прэзідэнта Рэспублікі Беларусь ад 24 лістапада 2006 г. №18 “Аб дадатковых мерах па дзяржаўнай абароне дзяцей у нядобранадзейных сем’ях”.

– Колькасць дзяцей даных катэгорый, якія праходзяць абследаванне ў інфекцыйным аддзяленні, штогод павялічваецца. Калі ў 2009 г. абследаванне прайшлі 50 дзяцей, то ў 2010 годзе – 84. Пры гэтым кошт 1 ложка-дня на сёння складае 94 тыс. рублёў, - расказала М.У.Гуменнік, раённы ўрач-педыятр.

Праблема сямейнай нядобранадзейнасці, на жаль, актуальна для нашага раёна. На каардынацыйным савеце, які вяла Г.С.Хвядзюк, старшыня савета, намеснік старшыні райвыканкама, была прааналізавана работа, якая праводзіцца на тэрыторыі Ракавіцкага сельскага савета па рэалізацыі Дэкрэта №18.

Адміністрацыяй і педагогамі школы многае робіцца па карэкцыі дзіцяча-бацькоўскіх адносін, павышэнні прэстыжу сям’і, псіхолага-педагагічнай адукацыі бацькоў. У той жа час члены каардынацыйнага савета звярнулі ўвагу кіраўніцтва школы на важнасць ранняга выяўлення нядобранадзейнасці.

– Аналіз узросту непаўналетніх, якія знаходзяцца ў сацыяльна небяспечным становішчы і маюць патрэбу ў дзяржаўнай абароне, сведчыць аб схаванай нядобранадзейнасці сем’яў у пачатковым звяне, а таксама аб недастатковай прафілактычнай рабоце класных кіраўнікоў, выхавацеляў, - звярнула ўвагу В.П.Чыжык, галоўны спецыяліст аддзела адукацыі райвыканкама.

Аб тым, што такая праблема існуе, сведчаць і лічбы, якія прывяла Ж.В.Карпук, намеснік старшыні камісіі па справах непаўналетніх. Так, калі ў 2007 годзе на тэрыторыі сельсавета было адабрана з сям’і 1 дзіця, то ў 2008 – 12, у 2010 – 8, у бягучым годзе – 5.

– На кантролі знаходзіцца пытанне працоўнай дысцыпліны абавязаных асоб, – гаворыць В.Р. Мікалайчык, намеснік начальніка Шчучынскага РАУС. – За 6 месяцаў бягучага года на тэрыторыі Ракавіцкага сельсавета работнікам міліцыі прыйшлося адрэагаваць 51 разоў па фактах прагулаў. Валерый Раманавіч звярнуў увагу на тое, што неабходна высвятляць прычыны нявыхаду на работу: гора-бацькі абавязаны выплачваць расходы дзяржаве за ўтрыманне дзяцей, а таму павінны працаваць.

На сённяшні дзень 6 дзяцей з Ракавіцкага сельскага савета знаходзяцца ў сацыяльна-педагагічным прытулку, а ўсяго там зараз пражываюць 28 хлопчыкаў і дзяўчынак. У іх бацькоў яшчэ ёсць шанц перагледзець свае адносіны да жыцця і ўласных дзяцей.
Вольга ЦІШКО.