За парадак – грамадою!

На пасяджэнні міжведамаснага каардынацыйнага савета па прафілактыцы п’янства і незаконнага абароту наркотыкаў разглядаліся пытанні аб узроўні працоўнай і выканаўчай дысцыпліны ў саўгасе “Вялікае Мажэйкава” і дзейнасці дабравольных дружын на тэрыторыі Мажэйкаўскага і Навадворскага сельсаветаў.
– У нашай гаспадарцы надаецца вялікая ўвага прафілактыцы п’янства, – гаворыць спецыяліст па ідэалагічнай рабоце саўгаса “Вялікае Мажэйкава” Валерый Вячаслававіч Кандратовіч. – Тых, хто груба парушае працоўную дысцыпліну, прыходзіць на работу ў нецвярозым стане – звальняем. За менш значныя парушэнні прадугледжана адміністрацыйная адказнасць.
Між іншым, кіраўніцтва саўгаса “Вялікае Мажэйкава” заўсёды ідзе насустрач тым, хто жадае парваць са шкоднымі прывычкамі і пачаць новае жыццё: гаспадарка аплачвае лячэнне ад алкагольнай залежнасці. Такой магчымасцю ўжо скарысталіся 15 чалавек. На жаль, 6 з іх не вытрымалі і месяца без алкаголю…

Старшыня Мажэйкаўскага сельвыканкама Наталля Чаславаўна Хоміч паведаміла прысутным аб дзейнасці добраахвотнай дружыны на тэрыторыі сельсавета.

– Актывісты сумесна з участковым інспектарам міліцыі патрулююць па вуліцах, праводзяць спецыяльныя рэйды з мэтай прадухілення крадзяжоў. Акрамя таго, займаюцца аховай правапарадку, наведваюць нядобранадзейныя сем’і… Работа не спыняецца ў выхадныя і святочныя дні. Сёлета з удзелам дружыннікаў было выяўлена пяць правапарушэнняў.

Не адстаюць ад сваіх калег і навадворскія дружыннікі, якія сумесна з супрацоўнікамі пагранічнага паста “Матылі” ахоўваюць Дзяржаўную мяжу, сочаць за выкананнем грамадзянамі правіл пражывання ў пагранзоне. За аказаную пагранічнікам дапамогу Ганаровай граматай узнагароджаны дружыннік А.Г. Валошка, а Г.І. Скорбу аб’яўлена падзяка. За актыўны ўдзел у затрыманні парушальніка пагранічнага рэжыму Падзячным пісьмом адзначаны В.І. Саковіч.

Падчас разгляду дзейнасці дабравольных дружын былі выяўлены некаторыя недахопы ў арганізацыі работы. Члены савета вызначылі шляхі для аператыўнага вырашэння ўзнікаючых праблем, а таксама абмеркавалі пытанні заахвочвання і стымулявання дружыннікаў для павышэння эфектыўнасці іх работы.
Аляксандр КАСПЯРЧУК.