Дбайныя гаспадары ідуць на кантакт

45 сем’яў з Рэзаў згадзіліся прыняць удзел у выбарачным абследаванні асабістых падсобных гаспадарак грамадзян. Атрыманая інфармацыя патрэбна, каб падтрымліваць харчовую бяспеку краіны.

– Галоўная мэта абследавання – вывучэнне аб’ёмаў вытворчасці сельскагаспадарчай прадукцыі ў гаспадарках насельніцтва, удасканаленне парадку збору інфармацыі ў галінах раслінаводства і жывёлагадоўлі, – гаворыць начальнік аддзела статыстыкі Шчучынскага раёна Наталля Чаславаўна Шандроха. – Сем’ям, што згадзіліся прыняць удзел у гэтай акцыі, выдадзены спецыяльныя дзённікі, у якія неабходна заносіць падрабязную інфармацыю аб развіцці асабістай падсобнай гаспадаркі. За вядзенне дакументацыі і прадастаўленне неабходных звестак пры апытанні ўдзельнікам выбарачнага абследавання будзе выплачвацца штомесячнае грашовае ўзнагароджанне.

– Наша сям’я ўдзельнічае ў абследаванні ўжо не першы раз, – дзеліцца Алена Антонаўна Іванчык. – Некаторыя суседзі з недаверам ставяцца да візітаў спецыялістаў аддзела статыстыкі, аднак я лічу, што ў гэтай сітуацыі трэба пайсці насустрач: справа ж дзяржаўнай важнасці! Мне не сорамна паказаць сваю гаспадарку, таму я з задавальненнем дзялюся інфармацыяй!

Сапраўды, сям’ю Іванчык ведаюць як дбайных і працавітых вяскоўцаў. Чаго толькі няма на дагледжаных градках Алены Антонаўны! Акрамя таго маладая жанчына з мужам трымае свіней. Адным словам, не перавяліся ў вёсцы сапраўдныя гаспадары!

У гэты дзень спецыялісты аддзела статыстыкі абышлі не адзін дзесятак сямей, якія любяць працаваць на зямлі, трымаюць гаспадарку. Людзі з разуменнем ставіліся да праводзімага абследавання і з задавальненнем згадзіліся супрацоўнічаць.
Аляксандр КАСПЯРЧУК.