Сябруе Шчучын з Чарнаўцамі

Паміж Шчучынскім райвыканкамам і беларускай суполкай Чарнавіцкай вобласці дасягнута пагадненне аб узаемавыгадным супрацоўніцтве ў галінах адукацыі, культуры, спорту і турызму.

– Наладжванню кантактаў з землякамі, якія пражываюць па-за межамі нашай краіны, у райвыканкаме надаецца вялікая ўвага, – гаворыць галоўны спецыяліст аддзела ідэалагічнай работы райвыканкама Сяргей Генрыхавіч Шандроха. – Згодна з рашэннем Савета Міністраў Рэспублікі Беларусь у мэтах развіцця супрацоўніцтва па схеме “адміністрацыйны раён Беларусі – грамадская арганізацыя суайчыннікаў за мяжой” у раёне праводзіцца сур’ёзная работа па вызначэнні напрамкаў магчымага супрацоўніцтва з суполкамі беларусаў у іншых краінах у сферах эканомікі, культуры, адукацыі, турызму і інш.

У 2010 годзе мы наладзілі кантакт з землякамі, якія пражываюць у суседняй Украіне – у горадзе Чарнаўцы. Чарнавіцкае культурна-асветніцкае таварыства беларусаў выказала зацікаўленасць у супрацоўніцтве са Шчучынскім раёнам у розных галінах гаспадаркі, а таксама ў сацыяльна-культурнай сферы і развіцці турызму. Члены таварыства сумесна з турыстычнымі арганізацыямі рэгіёна распрацавалі аўтобусны маршрут па славутых мясцінах Чарнавіцкага раёна. Дарэчы, украінскія сябры запрашаюць у гэта падарожжа і шчучынцаў. Акрамя таго, прапанавалі арганізаваць сумесную навукова-практычную канферэнцыю “Моладзевая палітыка, адукацыя – вопыт арганізацыі работы ў Беларусі і ва Украіне”, запрасілі прыняць удзел у Пятроўскім кірмашы і наведаць мастацкі і краязнаўчы музеі горада Чарнаўцы… Чарнавіччан вельмі зацікавіла прадукцыя шчучынскіх завода “Аўтапровад” і масласырзавода.

Шчучынскі аддзел культуры сумесна з РДК падрыхтавалі для чарнавіцкіх сяброў падарункі: сем нацыянальных касцюмаў для ўдзелу ў мастацкай самадзейнасці і кнігі класіка беларускай літаратуры Максіма Багдановіча. Хутка “прэзент” будзе высланы ў Чарнаўцы, а разам – праект пагаднення аб далейшым супрацоўніцтве і развіцці адносін паміж Шчучынскім райвыканкамам і беларускай суполкай Чарнавіцкай вобласці.
– Узаемавыгаднае супрацоўніцтва з суайчыннікамі, якія пражываюць у іншых краінах, адкрывае новыя перспектывы для далейшага развіцця нашага раёна, – сцвярджае С.Г. Шандроха. – Таму мы імкнемся падтрымліваць і пашыраць сувязі з беларускай дыяспарай за мяжой.
Аляксандр КАСПЯРЧУК.

Па розных дадзеных па-за межамі Беларусі пражываюць каля 3,5 млн. беларусаў, выхадцаў з Беларусі і іх нашчадкаў. У месцах кампактнага пражывання большая частка нашых суайчыннікаў аб’яднана ў больш чым 200 грамадскіх згуртаванняў і арганізацый.