І на флікеры ёсць… мода!

Насця – выхаванка Астрынскага цэнтра пазашкольнай работы.
– Калі я першы раз прыйшла ў цэнтр – нават не магу ўспомніць. Здаецца, я тут вырасла, – расказвае Насця. – Люблю майстраваць штосьці сваімі рукамі, нешта ствараць, фантазіраваць – у працэсе творчага пошуку “нараджаюцца” мае работы. Гэта дастаўляе сапраўднае задавальненне.

Многія з яе твораў сталі своеасаблівымі экспанатамі выставы цэнтра пазашкольнай работы. А шматлікія граматы, атрыманыя за ўдзел у самых розных конкурсах, беражліва захоўваюцца сярод узнагарод іншых выхаванцаў. Яны не толькі сведчанне дасягненняў юных дараванняў, але і доказ паспяховай працы выкладчыкаў.

Работа Насці “Мода на святлоадбівальныя элементы ў дзіцячым і падлеткавым адзенні “Сучасны стыль”, над якой яна працавала разам з кіраўніком гуртка “Залатая іголка” Жаннай Канстанцінаўнай Мухля, стала лепшай у сваёй намінацыі. Увогуле 56 работ прымалі ўдзел у рэспубліканскай выставе.
– Я не толькі ствараю эскізы адзення – некаторыя мадэлі шыю для сябе сваімі рукамі, але толькі калі ёсць час, – гаворыць Насця. – У вучэбна-вытворчым камбінаце я займалася па спецыяльнасці “швейная справа” і атрымала званне “Лепшая па прафесіі”.

Адкрыю невялічкі сакрэт – яшчэ нядаўна Насця збіралася стаць дызайнерам. У апошні момант перадумала і вырашыла накіравацца ў журналістыку. Напэўна, узяла верх яе схільнасць да рускай мовы, хаця спевы і выяўленчае мастацтва заўсёды прываблівалі дзяўчыну.

Узнагароджанне пераможцаў рэспубліканскага праекта, а вызначаліся яны ў чатырох намінацыях – “Дзіцячая анімацыя”, “Відэаролікі”, “Эскізы” і “Мадэлі” – праходзіла ў Мінску, у Нацыянальным цэнтры мастацкай творчасці дзяцей і моладзі. Усе работы ўдзельнікаў аб’ядноўвала надзвычай актуальная тэма – выкарыстанне флікераў. З урачыстасці Насця прывезла чатыры дыпломы ад арганізатараў праекта і падарункі, сярод якіх – падборка газет “Пераходны ўзрост” і надзіманы матрац. Патрэбная, між іншым, рэч падчас летняга адпачынку!

Ганна РУДСКАЯ.
Фота аўтара.