Пры звароце ў паліклініку трэба мець пры сабе пашпарт

Калі ў вёсцы Першамайская бальніцу пабудуюць? – цікавіўся жыхар Матылёў. – І чаму спецыялісты ЦРБ не выязджаюць сюды, каб пракансультаваць пацыентаў-вяскоўцаў?
– Установа аховы здароўя “Шчучынская ЦРБ” – бюджэтная арганізацыя. Сродкі на будаўніцтва выдзяляюцца з бюджэту. Ад аб’ёмаў фінансавання, якое паступіць, і будуць залежаць ход і тэмпы работ на гэтым патрэбным для сельскіх жыхароў аб’екце.
Гэта па-першае. Па-другое, у пачатку года складаецца графік выезду спецыялістаў ва ўсе сельскія амбулаторыі і бальніцы, у тым ліку і Першамайскую. Ён узгадняецца з загадчыцай бальніцы. Яна ж вызначае, кансультацыя якіх канкрэтна вузкіх спецыялістаў аказваецца найбольш запатрабаванай. Вядома ж, з улікам дыягназаў і стану здароўя пацыентаў, што атрымліваюць медыцынскую дапамогу ў гэтай медустанове.
Для лячэння сваёй хваробы атрымліваю прэпараты па льготных рэцэптах. Нядаўна адзін з іх даў нежаданую рэакцыю – выклікаў алергію. Ці магчыма замяніць яго на іншы?
– Калі ласка, прыходзьце на прыём да доктара, дзе і вырашым праблему – з улікам стану здароўя падбяром новы прэпарат і выпішам рэцэпт.
Пры звароце ў рэгістратуру паліклінікі па амбулаторную картку ў мяне запатрабавалі пашпарт. Раней такой практыкі не было. Чаму змяніліся правілы?
– Сапраўды, пры звароце ў паліклініку трэба мець пры сабе пашпарт. Так што, плануючы візіт да ўрача, загадзя пакладзіце ў сумку гэты дакумент. І гэта не нейкая адсябяціна кіраўніцтва нашай медустановы, а патрабаванне, выкладзенае ў загадзе Міністэрства аховы здароўя ад 30 жніўня 2007 г. Без наяўнасці дакумента, які сведчыць асобу, не выдаюцца медыцынскія даведкі аб стане здароўя, выпіскі з амбулаторнай карты і г.д.
Падрыхтавала
Таццяна ПАЛУБЯТКА.
Фота Сяргея ГАРДЗЕЙЧЫКА.