Крымінальны дайджэст

Невядомы злодзей, які шляхам падбору ключоў забраўся ў падсобнае памяшканне адной з гарадскіх будоўляў, атрымаў “знатны” ўлоў – з аб’екта зніклі некалькі перфаратараў, дрыль, шліфавальная машынка і іншы інструмент фірмы “Бош”.

Пацярпелы ацаніў страты на суму 8 мільёнаў рублёў. Адметна, што злачынца не пагрэбаваў і звычайнымі шрубамі, кранштэйнамі і іншымі дробнымі метызамі. Па факце крадзяжу ўзбуджана крымінальная справа, вядзецца следства.

Захоўвайце грошы ў банку

Усяго на некалькі хвілін адышла ад дома жыхарка вёскі Альхоўка, але невядомаму хапіла і гэтага, каб абшукаць домаўладанне пенсіянеркі і выцягнуць з-пад ложка 3-літровы слоік з грашамі. Пацярпелая страціла паўтара мільёна рублёў рознымі купюрамі.

Міліцыя нядоўга шукала злачынцу. Па гарачых слядах быў затрыманы непрацуючы раней судзімы жыхар той жа вёскі. Мужчына віну прызнаў, але грошы вярнуць не змог – патраціў іх на спіртныя напоі і прадукты харчавання.

Вярніце “каліфарнійцаў”!

Калі жыхар вёскі Чырвоная Буда прыйшоў пакарміць сваіх гадаванцаў, быў непрыемна здзіўлены – у клетках адсутнічала некалькі трусаў.

Як высветлілася пазней, невядомыя ноччу выламалі частку агароджы і забралі шасцярых трусаў пароды “Каліфарнійскі матылёк”. Страты пацярпелы ацаніў у 600 тысяч рублёў.

Шукае міліцыя, шукаюць пажарныя…

Два дні чакаў дачнік Д., пакуль вернуцца з лесу яго сын з сужыцелькай, а потым звярнуўся ў міліцыю.

Пакуль ішлі пошукі ў лесе, праваахоўнікі вырашылі праверыць гомельскую кватэру “грыбнікоў”. Дзверы наведвальнікам адчынілі самі прапаўшыя, якія нават не падазравалі, што іх аб’явілі ў вышук.

Бражка лілася ракой

У доме адной з жыхарак вёскі Насовічы міліцыянеры знайшлі 90 літраў брагі і 7 літраў гарэлкі. Крыху меншымі аб’ёмамі сыравіны і гатовай прадукцыі валодала жыхарка Кругавец- Калініна – 20 літраў брагі і 1,5 літра гарэлкі.

У адносінах да дзвюх падпольных гандлярак спіртным складзены адміністрацыйныя пратаколы. Узоры вадкасці накіраваны на аналіз у абласную лабараторыю.

Багатыя беспрацоўныя

На аўтадарозе “Добруш – Карма” быў затрыманы аўтамабіль “ГАЗ –53”, які належыць беспрацоўнаму М. За рулём машыны таксама знаходзіўся беспрацоўны Д., а ў кузаве машыны – 5 тон кантрабанднага металалому.

Дакументаў на груз вадзіцель прадставіць не змог. І машына, і металалом былі дастаўлены ў РАУС для праверкі. Цікава, адкуль у беспрацоўных узяліся грошы, каб набыць і машыну, і столькі металу?

Сяргей ЧАЙДАК