Наша ўвага – дарогам

За паўгоддзе ДРБУ-150 выканала работ на суму 7 мільярдаў 917 мільёнаў рублёў, што на 38,6% больш, чым за той жа перыяд мінулага года. Аб тым, якія дарогі ў раёне былі адрамантаваны, аб планах на другое паўгоддзе карэспандэнту «Добрушскага краю» расказаў дырэктар прадпрыемства Анатоль Цімафеевіч Горбань.

Пытанне рамонту дарог у раёне ўзнімаецца рэгулярна: і на нарадах раённай улады, і ў зваротах грамадзян. На балансе прадпрыемства знаходзіцца 392,6 кіламетра мясцовых дарог.

Заканамерныя прэтэнзіі тых, каму па гэтых дарогах прыходзіцца кожны дзень хадзіць і ездзіць, не застаюцца без увагі. Так, у Добрушы сёлета адрамантавана дарожнае пакрыцце на вуліцах Першамайская, Лясная, зроблены бягучы рамонт вуліцы Фрунзе, добраўпарадкаваны мікрараён “Меліяратар”. Работнікі арганізацыі працавалі таксама ў Кузьмінічах, Леніна, Церахоўцы.

Вытворчасць на аднаго работніка ўпраўлення склала 75,4 мільёна рублёў, рост у параўнанні з 2010 годам – 137,3%, прыбытак павялічыўся на 15%, прычым сярэдняспісачная колькасць работнікаў склала толькі 101% да мінулага года. Так, спецыялісты з Добрушскага ДРБУ прыклалі руку да рэканструкцыі мікрараёнаў №94, №96, “Хутар І” і “Хутар ІІ”, вуліц Севастопальская і Галавачова ў Гомелі, птушынай фабрыкі “Рассвет”.

–На працягу дзесяці год нашы мясцовыя дарогі – лепшыя ў вобласці, – расказвае Анатоль Цімафеевіч. –Наш паказчык утрымання дарог нават вышэйшы, чым абласны. Гэта дасягаецца пры дапамозе правядзення якасных і своечасовых прафілактычных мерапрыемстваў, таму пальма першынства заўсёды ў нашых руках. На працягу двух апошніх год арганізацыя абнавіла аўтамабільны парк, у прыватнасці, купіла 7 МАЗаў, 2 каткі і “Амкадор”, што дазваляе нарошчваць тэмпы работы.

Залогам поспеху і росту прадукцыйнасці працы, акрамя тэхнікі і абсталявання, з'яўляецца і чалавечы фактар. У прыватнасці, арганізацыя забяспечвае сваіх работнікаў працай без прастояў.

У планах прадпрыемства – добраўпарадкаванне дарог у населеных пунктах Стары і Новы Крупец, Леніна, рамонт пакрыцця на МТФ ПСУП “Церахоўка-Агра”. Акрамя таго, актыўна вядуцца работы ў мікрараёне “Меліяратар”.