Дапамагчы і выратаваць

8 жніўня ў памяшканні Дубоваложскага Дома культуры адбылася нарада кіраўнікоў шэрагу ўстаноў і арганізацый раёна, на якой разглядаліся пытанні паляпшэння сацыяльна-грамадскага становішча ў вёсцы Дубовы Лог

Вяла нараду старшыня райвыканкама В.Ф.Мохарава.

Не сакрэт, што пытанне алкагалізацыі сельскага насельніцтва даўно турбуе ўладу. Алкагалізм, як ракавая пухліна, раз’ядае грамадства, наносіць непапраўную шкоду калектывам і сем’ям. У такіх гора-бацькоў клопат пра сваіх дзяцей стаіць на апошнім месцы. Галоўнае – напіцца, а там – хоць трава не расці.

Удзельнікі нарады прыйшлі да высновы, што неабходна перагледзець прынцыпы работы ў вёсцы, унесці нешта новае, рацыянальнае. Адпаведныя даручэнні атрымалі начальнік аддзела культуры Р.П.Козыраў, начальнік аддзела адукацыі І.М.Шкаруба, начальнік РАУС В.В.Марчанка, галоўны ўрач раённай бальніцы Н.А.Белаглазава, начальнік аддзела па справах моладзі Р.У.Сікорскі, начальнік аддзела ідэалагічнай работы Н.А.Доля і іншыя кіраўнікі, на падставе якіх будуць распрацаваны раённыя мерапрыемствы.

Адным з рычагоў эфектыўнага ўздзеяння на дзяцей і падлеткаў можа стаць больш шчыльны графік работы гурткоў па інтарэсах і заняткі спортам. Аддзелу па фізічнай культуры, спорце і турызме даручана абсталяваць футбольнае поле і валейбольную пляцоўку, аснасціць іх неабходным інвентаром. Указана на неабходнасць выхавання дзяцей і падлеткаў на станоўчых прыкладах зорак спорту – ураджэнцаў нашага раёна. Падлеткі павінны бачыць перспектыву і сваім стаўленнем да вучобы і спорту імкнуцца да яе.

Ужо з 9 жніўня сіламі медыкаў і супрацоўнікаў ДАІ арганізаваны выпуск на лінію аўтатрактарнай тэхнікі, што павінна паспрыяць умацаванню вытворчай дысцыпліны.

На думку В.Ф.Мохаравай, сітуацыя, якая ўзнікла ў вёсцы, справакавана не толькі алкагалізацыяй насельніцтва, але і адарванасцю ад царквы. Як паказвае сусветны вопыт, менавіта царква можа адыграць станоўчую ролю ў барацьбе з гэтай заганай. А таму прызнана мэтазгоднай падрыхтоўка памяшкання для адпраўлення царкоўных службаў і запрашэнне служыцеля царквы ў вёску.

Неабходна адзначыць, што нарада прайшла ў канструктыўным рэчышчы. Усе, хто хацеў выказацца, зрабілі гэта.

Напярэдадні нарады ўсе зацікаўленыя службы падрыхтавалі планы прафілактычных мерапрыемстваў па барацьбе з п’янствам і алкагалізмам, якія і разгледжаны ў Дубовым Лозе. Іх напрацоўкі павінны легчы ў аснову раённага плана.

На сёння назначана сустрэча В.Ф.Мохаравай з жыхарамі вёскі. Старшыня райвыканкама хоча асабіста выслухаць сялян, разабрацца ў праблемах, знайсці агульныя шляхі іх вырашэння. У выпадку станоўчых вынікаў вопыт работы ў вёсцы Дубовы Лог будзе перанесены ў іншыя населеныя пункты раёна.