Праз 100 жыццёвых сцяжынак

2 жніўня Вольга Андрэеўна Бандарэнка адзначыла свой 100-гадовы юбілей

Згадзіцеся, не так часта здараюцца такія знамянальныя падзеі, як 100-гадовы юбілей чалавека. На гэтым тыдні яго сустрэла Вольга Андрэеўна Бандарэнка з Насовіч. Жанчына прымала цёплыя словы віншаванняў ад дзвюх сясцёр, дачок, суседзяў. Кветкі, падарункі ў гэты дзень былі для яе – шчырай працаўніцы, клапатлівай маці, проста цудоўнай жанчыны.

– Малайчына яна ў нас! – пахваліла імянінніцу 87-гадовая сястра Марыя. – У яе выдаўся нялёгкі, але шчаслівы лёс.

Нарадзілася Вольга Андрэеўна ў невялічкай вёсцы Апалонаўка Грабаўскага сельсавета былога Церахоўскага раёна. З маленства яе рукі прывыклі да нялёгкай сялянскай працы.

У трывожным ліпені 1941 года праводзіла на фронт свайго мужа Івана Палікарпавіча. Так і не дачакалася яго, адна засталася з малалетнімі дзецьмі на руках. Працавала ў полі, на ферме, будавалася.

– Наша Вольга любіць жыццё, людзей, дасціпны жарт, – расказвае яе другая сястра Соф’я. – Менавіта ў гэтым бачу сакрэт яе даўгалецця.

Доўгі час Вольга Андрэеўна працавала даяркай у былым племзаводзе “Насовічы”. А калі збіралася пайсці на заслужаны адпачынак, прапанавала сабе замену. Ёй аказалася старэйшая дачка Таццяна.

– У цябе ўсё атрымаецца! – толькі і сказала.

І атрымалася. Працоўная слава даяркі з Насовіч Т.І.Трафімовіч была вядома далёка за межамі вобласці, рэспублікі. А як ганарылася маці, калі дачка стала Героем Сацыялістычнай Працы!

Павіншаваць маці Героя са 100-гадовым юбілеем прыехалі старшыня раённага Савета дэпутатаў А.М.Барсякоў, старшыня райкама прафсаюза работнікаў аграпрамысловага комплексу В.А.Баўкуновіч, прадстаўнікі КСУП “Красная Буда”. Гучалі цёплыя словы віншаванняў, пажаданняў.

Малайчынай трымалася сама Вольга Андрэеўна. Спрабавала ўсміхацца, крыху жартавала, усім гаварыла:

– Вялікае дзякуй, што не забылі!

Мікола ШЫШОЎ