Почему Ружанская мебельная фабрика сдает позиции?

Пасяджэнне райвыканкама з выездам на Ружанскую мэблевую фабрыку было выклікана тым трывожным становішчам, якое, на думку кіраўніцтва раёна,  склалася тут апошнім часам. Вынікі дзейнасці прадпрыемства за мінулы год яскрава сведчаць, што яму не ўдалося поўнасцю пераадолець негатыўныя наступствы 2009 года і выйсці на запланаваныя параметры эканамічнага развіцця. У першым квартале 2011 года сітуацыя на фабрыцы яшчэ больш пагоршылася. З-за зніжэння  попыту на мэблю на асноўным для ружанцаў экспартным рынку ў Казахстане значна зменшыўся аб’ём вытворчасці:  за тры першыя месяцы гэтага года ён склаў толькі 89,2 працэнта да адпаведнага перыяду мінулага года ў фактычных цэнах, а ў супастаўных — 75,5%. Правальным стаў і красавік – 63,1 працэнта  ў супастаўных цэнах. АЛЕ НАВАТ і пры такіх аб’ёмах вытворчасці  запасы гатовай прадукцыі склалі 3,8 мільярда рублёў, або амаль двухмесячны аб’ём выпуску. Прадпрыемства апынулася ў цяжкім фінансавым становішчы: па выніках фінансава-эканамічнай дзейнасці за першы квартал 2011г. атрымана чыстая страта ў суме 50 млн. рублёў, тады як за адпаведны перыяд мінулага года прыбытак склаў 116 млн. рублёў. Кіраўніцтва раёна даручыла адміністрацыі прыватнага ўнітарнага прадпрыемства “Ружанская мэблевая фабрыка”, у склад якога, нагадаем, уваходзяць Ружанскі, Шарашоўскі і Ляснянскі (Баранавіцкі раён) вытворчыя цэхі, распрацаваць дадатковыя меры па развіцці прадпрыемства, якія б дазволілі пераламіць сітуацыю і выйсці на высокаэфектыўную работу. Аднак, на думку старшыні райвыканкама А.І.Юркевіча, да распрацоўкі  гэтых мер на фабрыцы падышлі фармальна, без глыбокага вывучэння прычын узнікшай  сітуацыі і аналізу эфекту пры іх рэалізацыі. Што ў прынцыпе і пацвердзілася ў час пасяджэння райвыканкама, калі справаздачу трымалі  дырэктар прадпрыемства В.М.Сідоранка і галоўныя спецыялісты. Нельга, безумоўна, сцвярджаць, што кіраўніцтва нічога не робіць для нарошчвання аб’ёмаў вытворчасці прадукцыі, збыту яе. Але складваецца ўражанне, што страчванне заваяваных раней высокіх пазіцый адбываецца па прычыне не надта зладжанай работы ўсёй каманды, калі галоўныя службы прадпрыемства ў сваёй дзейнасці не паспяваюць за імклівымі павевамі, якія адбываюцца на сучасным рынку. Напрыклад, на фабрыцы здзіўляюцца, чаму рабочыя не затрымліваюцца тут і катастрафічна не хапае працоўных рук. —А чаму здзіўляцца? – задае пытанне старшыня райвыканкама. –Адказ на гэтае пытанне на паверхні: мінуў час, калі у Ружанах, акрамя мэблевай фабрыкі, практычна не было куды падацца. Цяпер жа побач – вядомы ў рэспубліцы дзіцячы санатарый, імкліва развіваецца ААТ “Ружаны-Агра”, якія могуць прапанаваць не толькі рабочае месца, але і больш высокі заробак. Хто, пагадзіцеся, пойдзе на вашу фабрыку, дзе сярэднямесячная зарплата сёння складае толькі 760 тысяч рублёў? Тым больш, што практычна не паляпшаюцца ўмовы працы ў вытворчых цэхах, не будуецца сваё жыллё. На абедзве нагі кульгае, на думку членаў райвыканкама, работа маркетынгавай і камерцыйнай службаў. Безумоўна, больш выгадна наладзіць збыт прадукцыі оптам,  на экспарт. Але пры гэтым не варта забываць пра запасныя варыянты, у тым ліку на ўнутраным, мясцовым рынку. Не пайшла мэбля ў Казахстан – і ледзь не катастрофа. Маркетынгавая служба сцвярджае, што прадпрыемства праводзіць акцыі распродажу заляжалай на складзе прадукцыі, але чаму пра іх практычна ніхто не знае ў раёне?  І гэта пры тым, што мясцовыя пакупнікі  не па чутках ведаюць пра вартасці ружанскіх гарнітураў. Ды і ўвогуле, чаму б не скарыстацца часовай складанай сітуацыяй на валютным рынку, калі спажыўцы імкнуцца ўкласці свае грашовыя зберажэнні ў дарагія пакупкі? У ПРЫНЯТЫМ па разгледжаным пытанні рашэнні райвыканкам прызнаў нездавальняючай работу кіраўніцтва Ружанскай мэблевай фабрыкі па нарошчванні ў першым квартале гэтага года аб’ёмаў вытворчасці прадукцыі, зніжэнні яе запасаў на складах, стабілізацыі фінансавага становішча  і абавязаў сумесна з ААТ “Івацэвічдрэў” распрацаваць стратэгію далейшага развіцця прадпрыемства. Генеральны дырэктар ААТ “Івацэвіч-дрэў” Б.М.Міхнюк, які таксама прыняў удзел у пасяджэнні райвыканкама, выказаў спа-дзяванне, што фабрыка з дапамогай таварыства здолее выправіць сітуацыю і  зноў будзе ў ліку лепшых прадпрыемстваў.