На мир мы смотрим по-другому (+фото)

У кожнага свой погляд на навакольны свет: адны бачаць у лужыне брудную ваду, іншыя — арыгінальныя адлюстраванні людзей, будынкаў  і аблокаў. Ці шмат вакол такіх “крэатыўшчыкаў”? Дастаткова! Гэта пацвердзіў фотаконкурс “Свет вакол нас”, пераможцы якога былі названы 1 чэрвеня ў Пастаўскім Доме рамёстваў.

Творчае спаборніцтва арганізавалі члены мясцовага фотаклуба “Светосила” Андрэй Мацур і Рыта Шылей. З 1 сакавіка яны аб’явілі прыём работ сярод школьнікаў і студэнтаў ва ўзросце да 18 гадоў. Былі ўпэўнены: у  альбомах і камп’ютарных папках падлеткаў шмат яркіх фота­здымкаў. Тым не менш хваляваліся: ці захочуць аўтары выстаўляць свае работы на суд шырокай аўдыторыі? Як аказалася, дарэмна. На кліч арганізатараў адгукнулася каля сямідзесяці (!) чалавек.

—         Многія работы прыемна здзівілі, — прызнаўся старшыня “Светосилы” Андрэй Мацур. — Адчуваецца: падлеткі ў творчым пошуку, умеюць глядзець на свет нестандартна. На гэтай выставе мы паказваем найлепшыя, на наш погляд, здымкі, якія вызначаюцца мастацкасцю, арыгінальнасцю сюжэта і кампазіцыі. Але гэта не значыць, што іншыя здымкі дрэнныя. Малайцы ўсе. Вы не пабаяліся падзяліцца сваёй творчасцю — а гэта ўжо дасягненне.

Самым хвалюючым момантам мерапрыемства стала ўзнагароджванне пераможцаў. У намінацыі “Пейзаж і архітэктура” найлепшай прызнана работа гімназіста Аляксея Мітуневіча, другое месца ў выпускніцы СШ № 2 Ганны Пракаповіч, трэцяе — у вучаніцы СШ № 5 Ірыны Паўлавай.

Сярод здымкаў, дасланых у жанры партрэта, найбольшае захапленне журы выклікала работа юнага фатографа з Мядзела Лізы Карабейнік (дзякуючы рэкламе ў сацыяльных сетках жаданне ўдзельнічаць у конкурсе выказалі падлеткі з суседніх рэгіёнаў, арганізатары іх ініцыятыву толькі віталі). “Срэбра” дасталася пастаўскай гімназістцы Дар’і Гутар, “бронза” таксама паехала ў Мядзел — яе атрымала Кацярына Адамовіч.

У намінацыі “Рэпартаж” перамагла работа вучаніцы СШ № 1 Вікторыі Вярцінскай, другое месца заняла ўзгаданая вышэй Кацярына Адамовіч, трэцяе ў Дар’і Мазуркевіч з Казлоўшчыны. Усе прызёры ўзнагароджаны дыпломамі і сувенірамі.

Галоўнымі героямі большасці работ былі горад, людзі, прырода. Але не абышлося і без такіх, якія складана ўключыць у адну з намінацый. Іх вартасць арганізатары не маглі не адзначыць, таму яны прынялі рашэнне ўручыць два дадатковыя дыпломы. За крэатыўнасць, нестандартнае бачанне свету  іх атрымалі Ірына Паўлава (СШ № 5) і Кацярына Лысёнак (Камаі).

—         Было вельмі цікава паглядзець на свет вашымі вачыма, — звярнулася да падлеткаў куратар выставы Рыта Шылей. — Мы, арганізатары, рады знаёмству з такімі актыўнымі, творчымі юнакамі і дзяўчатамі. Спадзяюся, наша супрацоўніцтва працягнецца і надалей. Памятайце: дзверы фотаклуба для вас заўсёды адчынены. Прыходзьце, вучыцеся, паказвайце работы. Мы зробім усё ад нас залежнае, каб дапамагчы вам знайсці сябе ў захапляльным свеце фатаграфіі.

У Доме рамёстваў выстава застаецца да канца чэрвеня.

З найлепшымі работамі школьнікаў можна азнаёміцца тут:

[galler=127]

 Іна СНЯЖКОВА.