С футбольными мячами — на поля!

30 і 31 мая па ініцыятыве асацыяцыі “Беларуская федэрацыя футбола” і пры падтрымцы Міністэрства адукацыі краіны, ААТ “Белаграпрамбанк” і СП “Санта Брэмар” у рэспубліцы прайшла дабрачынная акцыя “Падары дзіцяці футбольны мяч”, прымеркаваная да заканчэння навучальнага года ў школах. На ўрачыстых лінейках з нагоды апошняга званка каля 22 тысяч перша­класнікаў больш чым з дзвюх тысяч сельскіх школ з усіх раёнаў Беларусі атрымалі ў падарунак новенькія футбольныя мячы з лагатыпамі ўдзельнікаў акцыі і выявамі рэкламных персанажаў — Агрыка і Юкі.

Названая акцыя праводзіцца ў Беларусі ўжо ў другі раз. У адрозненне ад мінулагодняй сёлетняя стала больш маштабнай, ахапіўшы не толькі малакамплектныя вясковыя школы, але і навучальныя ўстановы аграгарадкоў і пасёлкаў гарадскога тыпу. На Віцебшчыне іх аказалася звыш 350, у тым ліку 20 у нашым раёне. Усяго ж футбольныя мячы на Пастаўшчыне атрымалі 117 хлопчыкаў і дзяўчынак, якія закончылі першы клас. Вучням Камайскай СШ 30 мая іх уручыў упраўляючы ад­дзялення ААТ “Белаграпрамбанк” у г. Паставы Л. Л. Касарэўскі. У Варапаеўскую, Гуцкую, Лынтупскую і Юнькаўскую СШ адправіліся спецыялісты банка. У астатнія ж установы адукацыі мячы былі перададзены напярэдадні школьных лінеек і ўручаны дзецям прадстаўнікамі адміністрацый.

Выступаючы перад школьнікамі, іх бацькамі і настаўнікамі, супрацоўнікі банка адзначылі: мэта праекта “Падары дзіцяці футбольны мяч” — сумеснымі намаганнямі зацікаўленых бакоў далучыць дзяцей да футбола як самага масавага віду спорту. Арганізатары разлічваюць, што гэта акцыя стане добрай традыцыяй па правядзенні маштабных мерапрыемстваў, накіраваных на прапаганду фізічнай культуры і спорту, папулярызацыю сярод падрастаючага пакалення здаровага ладу жыцця.

Хочацца спадзявацца, што падораныя напачатку летніх канікулаў мячы дапамогуць адцягнуць дзяцей ад экранаў камп’ютараў і тэлевізараў, абудзяць у іх інтарэс да рухомых гульняў. Хлопчыкі і дзяўчынкі больш часу будуць праводзіць на вуліцы — у дварах і на футбольных палях. І, магчыма, у будучым сярод іх вырастуць сапраўдныя зоркі як мужчынскага, так і жаночага футбола.

Алена ШАПАВАЛАВА.