Главная награда — дети

Сям’я Чайкоўскіх.

24 мая ў Віцебску прайшоў фінал абласнога агляду-конкурсу “Лепшая мнагадзетная ­сям’я Віцебшчыны-2013”. У ім удзельнічала 9 ­сем’яў-пераможцаў рэгіянальных паўфіналаў з Пастаў, Браслава, Глыбокага, Наваполацка, Полацка, Оршы, Сянно, Расон і Віцебска. Наш раён прадстаўляла сям’я Чайкоўскіх з гарадскога пасёлка Варапаева.

Іна і Аляксандр, іх дзеці Андрэй, Аляксей і Руслан заслужана перамаглі на раённым этапе, былі ў ліку лепшых у Глыбокім, дзе праходзіў паўфінал. Таму іх паездку ў Віцебск трэба расцэньваць ужо як перамогу, бо за гэта ганаровае права змагаліся дзясяткі сем’яў з усіх раёнаў і буйных гарадоў Прыдзвінскага краю. У фінал трапілі лепшыя з лепшых — самыя таленавітыя, гаспадарлівыя, знаходлівыя.

Чайкоўскія ў такім акружэнні не разгубіліся, адчувалі сябе ўпэўнена, бо ўсё, пра што расказвалі і што паказвалі, было не гульнёй, сцэнічнай дзеяй, а неад’емнай часткай паўсядзённага жыцця. А яно, лічаць Чайкоўскія, звычайнае, такое ж, як у іншых жыхароў гарпасёлка. Іна працуе прадаўцом у магазіне рай­спажыўтаварыства, Аляксандр —  майстрам на заводзе жалезабетонных вырабаў, дзеці вучацца ў сярэдняй школе, а старэйшыя — яшчэ і ў музычнай. Рана стварыўшы сям’ю, а потым набыўшы ўласны дом, яны прывыклі рабіць усё самі, заахвочваюць да актыўнага жыцця і хлопчыкаў.

Пра ўсё гэта падчас конкурсу Чайкоўскія вельмі трапна расказалі ў візітнай картцы “Добры дзень, гэта мы!”.  Яны прадставілі сваю сям’ю такой, якая ёсць: дружнай, умелай, таленавітай. Дарослыя і дзеці спявалі, танцавалі, ігралі на баянах, у вершаванай форме, шчыра, ад сэрца расказалі пра свае працу і вучобу, захапленні і інтарэсы. Нягле­дзячы на тое, што на такім высокім узроўні мнагадзетная сям’я выступала ўпершыню, усе адчувалі сябе ўпэўнена, даказалі, што калі ёсць каханне і ўзаемаразуменне, калі ўсе ў адказе адно за другога, то і жыццёвыя цяжкасці адступаюць.

Журы прызнала “візітку” Чайкоўскіх лепшай і прысу­дзіла ім у гэтай намінацыі званне лаўрэата. Годна раскрылі сябе бацькі і дзеці і ў такіх конкурсных заданнях, як “Сацыяльная рэклама”, “Нашы ручкі залатыя”. І хаця ў агульным заліку ім не хапіла ўсяго некалькіх балаў, каб увайсці ў тройку лепшых, засмучанымі сябе, як і іншыя сем’і-фіналісты, Чайкоўскія не адчувалі. Вопыт удзелу ў такім мерапрыемстве стаў павучальным, узбагаціў жыццёвую практыку. Чайкоўскія не шкадуюць часу, які быў затрачаны на падрыхтоўку, шчыра ўдзячны за дапамогу і падтрымку кіраўніцтву  ўпраўлення па працы, занятасці і сацыяльнай абароне райвыканкама, а таксама сваёй творчай, ідэйнай камандзе — работнікам гарпасялковага Дома культуры Юліі Галяш, Ірыне Кузьміч і Аляксандру Іваніну.

Пётр КУРЫЛОВІЧ.

Фота Вольгі Тананы.