Лучший курорт — в Новосёлках

Сяргей Шчэрба

У гэтым перакананы шматлікія беларускія і замежныя турысты. У любую пару года яны прыязджаюць сюды, каб адпачыць у ганчарнай аграэкасядзібе “Акарына”. 

Гасцей з усяго свету вабіць не толькі  цнатлівая вясковая прырода, але і каларытны гаспадар сядзібы — народны майстар, удзельнік шматлікіх фестываляў і выстаў Сяргей Шчэрба. Ганчарствам ён пачаў займацца ў 1992 го­дзе і ўжо праз тры гады перамог у абласным конкурсе сярод сваіх калег па рамястве. Яшчэ праз год, у 1996-ым, Сяргею Уладзіміравічу пакарылася “рэспубліка”, пасля чаго ён быў прыняты ў Саюз майстроў народнай творчасці Беларусі.

—         Ужо калі сур’ёзна захапіўся ганчарствам, даведаўся, што гэтай жа справай займаўся і мой прадзед, — расказвае Сяргей Шчэрба. — Стараюся працягваць традыцыі продкаў: не выкарыстоўваю ніякіх сучасных тэхналогій і ствараю выключна аўтэнтычныя рэчы.

Першыя керамічныя вырабы ў сядзібе датуюцца… мінулымі стагоддзямі. Падчас працы на агародзе Сяргей Ула­дзіміравіч неаднойчы знаходзіў старадаўнія гліняныя рэчы. Лёсам, мусіць, было наканавана, што менавіта ў гэтым доме жыве і працуе майстар.

Турыстамі-першаадкрывальнікамі сядзібы сталі сябры. Яны ў сваю чаргу расказалі сваім знаёмым — і так дзякуючы “сарафаннаму радыё” інфармацыя пра гэта незвычайнае месца разляцелася па краіне і замежжы.

У 2008 годзе “Акарыну” наведалі першыя турыстычныя групы: сядзіба была завяршальным “акордам” маршруту “Залатое кола Пастаўшчыны”, распрацаванага пастаўскім Цэнтрам турысцкіх паслуг. Майстар-клас Сяргея Шчэрбы, музей яго керамічных вырабаў, чаяванне з самавара на 30 літраў… Хіба такое можа не здзівіць Нікога не пакідае раўнадушным і вясельны абрад “Нараджэнне гаршчочка шчасця”, які гаспадары ўжо больш за шэсць гадоў праводзяць для маладажонаў. Многія сем’і вяртаюцца ў сядзі­бу са сваімі дзеткамі, каб прыняць ­удзел у яшчэ адным абрадзе — “Далучэнне да творчасці”. Яго сутнасць заключаецца ў тым, каб зафіксаваць адпячаткі ручак і ножак на гліняным вырабе. “Дзіцяці ад роду ўсяго некалькі месяцаў, а свой след на зямлі яно пакі­нула ўжо”, — радуюцца бацькі. ?

Фота з архіва Сяргея Шчэрбы

Ярка праходзяць у сядзібе і дзіцячыя дні нараджэння. Іх сцэнарыі распрацоў­вае гаспадыня сядзібы — Людміла Эдуардаўна Шчэрба. Гэта толькі маленькая крупінка яе работы. Гаспадыня, чалавек надзвычай творчы і працавіты, захапляецца зборам лекавых траў, займаецца добраўпарадкаваннем тэрыторыі, шчыруе па гаспадарцы і на агародзе. І, вядома ж, дапамагае мужу ўвасабляць у жыццё шматлікія творчыя задумы.

Арыгінальнасць, гасціннасць робяць “Акарыну” надзвычай папулярнай ся­дзібай. Пацвярджэнне таму — геаграфія гасцей. Людзі якіх толькі нацыянальнасцей тут толькі ні адпачывалі: беларусы, рускія, палякі, немцы, англічане, японцы…

—         У жніўні чакаем гасцей з Камчаткі, — гаворыць Людміла Эдуардаўна. — Яны прыязджалі да нас раней і настолькі закахаліся ў нашы мясціны, што выказалі жаданне наведацца зноў. Любы курорт гатовы прамяняць на “Акарыну”. Для нас гэта найлепшая ацэнка працы. Мы дзелімся з людзьмі радасцю, творчасцю, якія носім у душы, атрымліваем ад працы шмат задавальнення. Гэта і ёсць самае вялікае шчасце.

Іна СНЯЖКОВА.

Фота аўтара.